শাগৈদগী ঈন্থোক্লে হায়না লাউথোকখ্রে

ওল ক্বাক্তা শঙ্গোমশুম্বম, মুশ্রম শাগৈ দেভলপমেন্ট কম্মিটি, বিষ্ণুপুর দিষ্ট্রিক্ট হায়রিবা কম্মিটি অসী ক্বাক্তা মায়কৈদা লৈরিবা শঙ্গোমশুম্বম, মুশ্রম শাগীগী মীওইশিংগী চাওখৎ-থৌরাং পায়খৎপগা লোয়ননা আইন্না য়াদবা থবক- থৌরমশিং চত্থরকপা পূম্নমক থিংননবা, দ্রগ অমদি নিষাগী পোৎলমশিং শীজীন্নবা, য়োনবা, লৈবা অমসুং কারবার তৌবনচিংবা থবক- থৌরমশিং থিঁংননবা শেমগৎখিবা শাগৈগী কম্মিটি অমনি।

তুংগী অফবা, তীঞ্জঙ-কায়জঙদবা, মতীকচাবা য়ূম্বীরেলশিং শেমগৎপদা য়ূম্ফম ওইবা কম্মিটি অসীনা ক্বাক্তা মায়কৈদা লৈরিবা শঙ্গোমশুম্বম, মুশ্রম শাগৈগী মীওই অমত্তা দ্রগ নম্বর ফোর অমদি মখল খূদীঙমক্কি নিষাগী পোৎলমশিং শীজীন্নবা, য়োনবনচিংবা য়ারোই হায়না অকনবা অথিংবা থমখ্রবসু থওইদনা মখাতানা দ্রগ কারবার চত্থরম্বগীদমক ক্বাক্তা ম্যুনিসিপাল কাউন্সিল ৱার্দ নম্বর ১ দা লৈবা শাগৈ অসীগী মোহম্মদ অমু খান অমসুং ৱার্দ নম্বর ৩ দা লৈরিবা মোহম্মদ হাফিজুদ্দিন কৌবা মীওই অনী অসী শাগৈ অসিদগী মতম কক্তনা ঈন্থোক্লে হায়না ঙরাং লাউথোকখ্রে।

শাগৈগী ৱারেপ থওইদবগীদমক মখোয় অনীবু ঈন্থোকপনি হায়না কম্মিটি অসীগী ইন্টর্নেল ওদিটর হাজী অব্দুল লাটিফ না ফোঙদোকখি। মখোয় অনীগা শাগৈ অসীগা করিগুম্বা হীরম অমত্তদা মরী লৈনররোই হায়না মহাক্না ফোঙদোকখি। পাউচেগী খূত্থাঙদা মীওই অনী অসীনা থম্মোয় শেংনা মশা-মশাগী মরালশিং য়াজবগা লোয়ননা মতূঙদা অসীগুম্বা মুস্লিম খুন্নাইনা, শাগৈনা অমসুং আইন্না য়াদ্রবা থবকশিং অসী অমূক হন্না তৌজররোই হায়না শেংদোক্লবা মতমদা মখোয়বু শাগৈনা লৌখৎপা নত্রগা লৌখত্তবগী ৱাফম অমুক হন্না খন্নগনি হায়রি।