গভর্নর-ইন-কাউন্সিলনা ভি দি এফশিংগী সর্বিস পেরদ মখাতানা চহী অমা শাংদোক্নবা অয়াবা পীখ্রে

লৈঙাক্না চহী অমমমগী ওইনা কন্ট্রেক্টতা এঙ্গেজ তৌদুনা লমদমসিগী লো এন্দ ওর্দর মেন্টেন তৌবদা আই আর বি, এম আর অমসুং মনিপুর পুলিসতা চাউনা মতেঙ পাংদুনা লাক্লিবা ভি দি এফ পার্সনেলশিংগী সার্বিস পেরদ মখাতানা চহী অমা শাংদোক্নবা ৱারেপ লৌখ্রে। হৌখিবা শগোলশেন নুমিত্তা রাজভবন্দা পাঙথোকখিবা গভর্নর- ইন-কাউন্সিলগী মীফম্না  ৱারেপ অসী লৌখিবনি। চহী অসীগী হৌখিবা এপ্রিল অমদগী পারগা কুমশিং ২০২৬ গী মার্চ থা ফাওবা সার্বিস পেরদকি মতম অদূ শাংদোকখিবনি।

ষ্টেট লৈঙাক্কি হোম দিপার্টমেন্টকি জোইন্ট সেক্রেটরি ময়েংবম ভেতো সিংহনা চেরোল অমদা ফোঙদোরকখিবগী মতূঙ ইন্না, ভি দি এফ পার্সনেলশিং অসী মনিপুর মীয়ামগী পুন্সি অমসুং লন- থুম ঙাক- শেনবদা মনিপুর পুলিস, আই আর বি অমসুং মনিপুর রাইফলস পার্সনেলশিংগা চপ মান্ননা মথৌদাং লৌদুনা লাক্লিবনি। হীঙশাগী ঈরাং মতমসিদা খুদোংথীনিঙায় ওইরিবা খুঙ্গং কয়াদা অহীঙ- নুংথিল খায়দনা মীয়ামগী পুন্সি অমসুং লন- থুম ঙাক্তুনা লাক্লিবনি হায়খি। মীয়ামগী সেক্যুরিটি পীবদা ভি দি এফ পার্সনেলশিংগী অচৌবা থৌদাং লৈ হায়বসি ষ্টেট লৈঙাক্না ময়েক শেংনা খঙঙি হায়না ভেতোনা ফোঙদোরক্লি।

কনফ্লিক্ট -প্রোন রেদ জোন এরিয়াশিংদা মীয়াম ঙাক- শেনবদা অমসুং ইন্সর্জেন্সি ওপরেসনশিংদা ভি দি এফ পার্সনেলশিং অসীনা য়াম্না মরুওইবা থৌদাং লৌদূনা লাক্লি হায়না জোইন্ট সেক্রেটরিনা ফোঙদোরক্লি। চৈরকশিদা, সিরূই ফেষ্টিভেলদা শরুক য়াবা লাকপা মৈতৈ কম্যুনিটিগী মীওইশিং হিংনা থাদোকখিরোইদবনি হায়বা ৱাফম ফোঙদোকখিবা কে এস ও দিল্লি য়ুনিটকি প্রসিদেন্ট পাউজাখূপ গুইতে ফাগৎননবা মনিপুর পুলিসনা এফ আই আর অমা লৌখৎখ্রে। মহাক ফাগৎনবা থবক পায়খৎপসু হৌখ্রে।