সেনাপটিদা এ আরগী গারি ২ মথক-মখা ওন্থোকখ্রে, কার অমসু মৈ থাদোকখ্রে

সেনাপটি দিষ্ট্রিক্ট মনূঙচন্না লৈরিবা ওক্লোংদা লৈবা এন এস সি এন -আই এমগী কেম্প অমা অসাম রাইফল্স কাঙবূ অমনা কোয়শীন্দুনা থম্ননবা থৌরাং তৌরে হায়বা ৱাফম অমা থোক্লকপদগী সেনাপটি দিষ্ট্রিক্টকি মফম কয়াদগী থোমজীন্নরকখিবা নাগা কাঙলূপকী মীয়াম্না এ আরগী গারি ২ মথক-মখা ওন্থোকখ্রে। মীয়াম অদূনা অল্টো কার অমগা বোলেরো কেম্পর অমসু মৈনা তুম্না থাদোকখ্রে। মীয়ামগী মতৌদু লেপতুনা য়েংবা নত্তনা আসাম রাইফল্স পার্সনেলশিং অদূ উপাই লৈখিদ্রে। নাগা আর্মীগী হেদ ক্বার্টর লৈরিবা ফুথ্রোং ব্রীগেদ মনাক্তা আসাম রাইফল্স অমসুং নাগা আর্মী অনীগী মরক্তা খূৎ থোক্নরে হায়না সোসিয়েল মেদিয়াদা তোকঙা অমা শন্দোরকপদগী হৌখিবা জুলাই ১৪ দা অচৌবা ঈরাং অমা সেনাপটি টাউন্দা থোক্লকখিবনি। তোকঙা অদূনা মরম ওইরগা মশীং য়াম্লবা মীয়াম্না সেনাপতি ডিস্ট্রিক্টকী ওক্লোংদা ঈরাং হৌরকপদা আসাম রাইফল্স অমদি মীচম-মীয়ামগী লন-থুম কয়া অমাঙ-অতা থোকখি হায়না পাউগী লীখূনশিংনা ফোঙদোক্নরক্লি।

জুলাই ১৪ গী নুংদাং পূং ৯ লোম তারকপদা মীয়াম থোক্নরক্নবা পাউজেল অমা সোসিয়েল মীদিয়াদা শন্দোরকখি। খূদক্তা মীয়াম্না মায়কৈ কয়াদগী চঙশীন্নরক্তুনা আসাম রাইফল্সকি কম্পেনি ওপরেটিং বেজ (সি ও বি) দা থোমজীল্লক্তুনা মফম অদূ থাদোক্তুনা চৎখিগদবনি হায়না আসাম রাইফল্স কাঙবুদা খঙহনখি হায়রি। আর্মীগী ছোর্স মতূঙ ইন্নদি, ইন্টেলিজেন্স রিপোর্ট অমা লৈবদগী ওক্লোংগী অকোয়বা মফমশিংদা থিবা-হূম্বগী থবক চত্থখিবনি। ওপরেসন অদুদা মীওই অহুম ফাগৎখি, মখোয়গী মশক-মমীং খঙদোক্নবা হোৎনখি। ভিল্লেজ চ্যেরমেননা মখোয়গী মশক তাক্লবা মতূঙদা মখোয় অহুম্মক অশোয়-অঙাম অমত্তা য়াওহন্দনা থাদোকখি।  এ আরগী পার্সনেলশিংনা দেজিগনেটেদ বাউন্দরি লান্সীনখিবা নত্রগা ওপরেসনগী প্রোটোকোলগী ৱাংমদা থবক তৌখিবা লৈতে হায়না ফোঙদোকখি।মীয়াম অদূনা মথোঙ-মরম খঙদনা আসাম রাইফল্সকি কম্পেনি ওপরেটিং বেজ দা নুঙনা থোমজিল্লকপা তৌরক্তুনা লন-থুম, গারীনচিংবা অমাঙ অতা থোকহনখিবনি হায়রি।

আসাম রাইফল্স কি ৪০৭ কেম্পর অনী মথক-মখা ওন্থোকখি।অল্টো কার অমা অমসুং ৱেটিং সেদ অমসু মীয়াম অদূনা মৈনা তুম্না থাদোকখিবনি হায়রি। মীয়ামগী ঈহৌ অদূ হেন্না কন্সীল্লকপদগী তঙায়ফদনা ট্যার গ্যাস সেল খরা কাপ্তুনা মীয়ামদু তানখায়দুনা ঈরাং অদূ কন্ট্রোল তৌখি হায়না আর্মীগী লীখূন অদুনা মখা তাখি।