হৌখিবা কুমশিং ২০২৩ গী মে অহুমদগী হৌনা চিন- কুকি জো কাঙলূপকি মিলিটেন্টশিংনা লুচিংদুনা সেপরেট এদমিনিষ্ট্রেসনগী দিমান্দ তৌরদুনা মৈতৈ ফূরূপকি মীচম মীয়াম হাৎপা, য়ূম মৈ থাবনচিংবগী ঈরাং হৌদূনা খুন্তাক লান্সিহনবগী ফীভম অমা হৌজিক ঈরমদম অসীদা মায়োক্নরিবা অসী লাকশীনবীননবা, লমদমসিদা তুং কোইনা শান্তি পুরক্ননবা অকনবা থবক পায়খৎপীননবা ইন্দিয়াগী প্রাইম মিনিষ্টর নরেন্দ্র মোদি লাক্লিবনি হায়না য়াম্না অৱাংবা থাক্তা মীয়াম্না থাজবা থম্নদুনা লাকখি।
প্রাইম মিনিষ্টর মোদিনা মনিপুরগী লৈমায়দা অমূক্তং খোঙদাবিরক্তুনা মীয়াম্না হৌজিক মায়োক্নরগা লৈরিবা হীঙশাগী ঈরাং অসী মতম চূপ্পগী ওইনা কোকহন্ননবা থবক পায়খৎপিরক্লগনি হায়না খন্নরম্বা অদূ থা অসীগী ১৩ দা পি এম মোদিনা চুরাচান্দপুর অমসুং ইম্ফালদা লাক্তুনা তোঙান-তোঙানবা মফম অনীদা মীয়ামদা ৱা ঙাঙলম্বা মতমদুদা মনিপুরদা হৌজিক মায়োক্নরগা লৈরিবা হীঙশাগী ঈরাং অসীগী মরমদা করিগুম্বা ৱাফম মচেৎ অমফাও পল্লমদনা প্রোজেক্ট খরা যাত্রা হুল্লম্বা, অদূগা প্রোজেক্ট খরগীনা শঙ্গারম্লগা তুমিন্না হনখিবা হায়বসী মনিপুর মীয়ামগীদি নুমিৎ-থা না লৈরিবমখৈ কাউঙমদনা লৈহৌরগদবা পেন্দবগী নুমিৎ অমা ওইহৌরগনি হায়না ফাউন্দেসন ফোর রুরেল অর্বান দেভলপমেন্ট, মনিপুরগী প্রসিদেন্ট এল তোম্বনা ফোঙদোরক্লি।
হেন্না পেন্নদ্রিবা অমনা, প্রাইম মিনিষ্টর মোদিনা মনিপুরদা লাক্লম্বা মতমদা চহী অহূম্লোম শুরক্কদৌরবা ঈরাং অসী কোকহন্ননবা হোৎনরম্বদি লায়রদনা ঈরাং অসীগী মরমদা করিগুম্বা ৱা মচেৎ অমত্তা হায়রমদনা, মতম চাদবা অকনবা নোংজু পুরক্তুনা মনিপুরদা খঙহৌদনা অচৌবা ঈচাও খূদোল ওইনা পীরম্বদগী ফৌ মরীক চূম্না মপাল শাৎলবা লৌফম পরী লীশীং কয়া ঈশীংনা লাকশীনহল্লমদুনা হীঙশাগী ঈরাং মায়োক্নরগা লৈরিবা মনিপুরগী মীয়ামদা হেন্না অৱাবা পীরম্লিবা অসিনি হায়না প্রসিদেন্ট অসীনা অঙকপগা লোয়ননা পেন্দবা ফোঙদোরক্লি।
চীঙগী এম এল এ শিংদি মশাগী ফূরুপ কন্দবা য়াদে হায়দুনা থৌনা ফনা চোংথোক্তুনা মতীং ফূদোক্তুনা সেপরেট এদমিনিষ্ট্রেসনগী দিমান্দ শৌগত্তুনা ৱা ঙাঙলক্লি অদূবু তম্পাক্কি এম এল এ শিংদি লিংজেল মান্নবসু লৈতে অদূগা মশাগী ফূরূপ কন্ননবগী, মনিপুরগী ইন্তিগরিটি ঙাক্ননবগী মতাঙদা ময়েক শেংবা, মকন্থী থোকপা ৱাফম অমত্তা ফোঙদোরকপসু লৈতে হায়না তোম্বনা পেন্দবা ফোঙদোরক্লি।মীয়ামগী লুচিংবা এম এল এ শিং লিংজেল মান্নবিয়ু, কম্যুনিটিশিংগী মরক্তসু ঐখোয় মশেল মরক্তা পূকচেল-খোয়জেল তিন্নরসি,নুংশি – চান্ননা হিংমিন্নরসি, মতমদুদা শান্তি লৈরবা, চাওখৎলবা ঈরমদম মনিপুর অমা শেমগৎপা ঙমগনি হায়না মহাক্না ফোঙদোকখি।