চৎলিবা জনুৱারী থা অসীগী নিপান্দা মোইরাং থানা লৈকায়দা লৈবা ভারত পেট্রোলিয়মগী এলিদাস ফ্যুয়ল ষ্টেসন্দা হেন্দ গ্ৰেনেদ অমা লংশিন্দুনা পোকখায়হল্লম্বা থৌদোক অদূদা হকথেঙননা চেন্নবনি হায়বা কে ৱাই কে এলগী এক্তিব মেম্বর নি হায়বা হিজম মনিচন্দ্র (৩৫) ,লৈফম্না ৱাইখোঙ চীঙদোং লৈকায় অসী থা অসীগী ১১ দা ককচীঙ কম্মান্দোগী য়ুনিট অমসুং ৪৬ শুবা আসাম রাইফলসকি অপূনবা খূৎপূ অমনা ফাগৎখ্রবা মতূঙদা অনীশুবা মীওই অমসু ফাগৎপা ঙমখ্রে।
মহাক্কি মমিংনা পুখ্রম্বম রবি এলাইজ খেং (৩৭) অপোকপা নিংথেমচন্দ্র কৌই, ৱাঙু সাবল অৱাং লৈকায়দগীনি। বিষ্ণুপুর দিষ্ট্রিক্ট পুলিস কম্মান্দোনা মতেঙ পাংবা মোইরাং পুলিসকি টিম অমনা মহাকপু ফাগৎখিবনি।
মসীগা লোয়ননা মনিপুর পেট্রোলিয়ম দিলর্স ফ্রেটরনিটিনা ওইল পম্পশিং থোঙ লোন্দুনা প্রোটেষ্ট তৌরকখিবা অদূসু লৈঙাক্কা য়ানবা পুরকপদগী ঙরাঙ নুংথিলদগী হৌনা খোঙজঙ হন্দোকখ্রে। ওইল পম্পশিং অমূক হন্না হাংদোকখ্রে।