এন পি পি ষ্টেট য়ুনিট মনূঙদা অচৌবা ময়ি চৎলকপা উবা ফংলি

অৱাং-নোংপোক ইন্দিয়াগী ওইনা খ্বাইদগী চাউরবা রিজনেল পোলিটিকেল পার্টি অমা ওইনা লৈরিবা নেস্নেল পিপলস পার্টি (এন পি পি) গী মনিপুর ষ্টেট য়ুনিট মনূঙদা পেন্নদবা,য়ানদবগী অচৌবা মমি অমা তারকপগা লোয়ননা চেকখায়রকপগী ময়ি অমা চাউনা থোক্লক্লি। হন্দক পোলিটিকেল পার্টি অসীগী নেস্নেল প্রেসিদেন্ট কোনরাদ কে সংমা ইম্ফালদা লাক্লমখি।

পার্টি অসীগী ওইনদি হায় কম্মান্দনা মথক্তগী লাউথরকপা ঙাইদুনা থবক তৌবগী চৎনবী লৈতে,হায় কম্মান্দগী য়াথং লৌদবা য়াদে হায়বগী চৎন -পথাপ করিসু থোইনা লৈতে হায়না ফোঙদোক্লম্বা অদূগী ওন্ন-তৈনবদা চৎলিবা নবেম্বর থা অসীগী ২২ দা সংমানা ওর্দর অমা ঈখঙ খঙহৌদনা থোক্লক্তুনা ষ্টেট য়ুনিট অসীগী নৌনা থৌ পুরগদবা থৌমীশিং খল্লকখিবগা লোয়ননা মনিপুর ষ্টেট য়ুনিটকি প্রেসিদেন্টকি ফম ফাওবা অতোপ্পা মীশক অমদা হাপ্লকখিবা অসী পার্টি অসিদা হান্নদগী থৌ পুদুনা লৈরক্লিবা মীওই অমত্তদা মাঙজৌননা খঙহল্লম্বসু লৈতে হায়না পার্টি অসীগী ষ্টেট য়ুনিট কি প্রেসিদেন্ট ওইনা লৈরকখিবা য়ূম্নাম জয়কুমারনা পাউমীশিংদা পেন্দবা ফোঙদোরকখ্রে।

নাউরেমথোংদা লৈবা পার্টি অসীগী ওফিসতা পাঙথোকখিবা পাউমীশিংগা উনবগী থৌরমদা ৱাফমশিং অসী ফোঙদোক্লদুনা জয়কুমারনা হায়,রিজনেল পার্টি অসীবু থৱায় হাপ্ননবা অমদি হেন্না মপাঙ্গল কলহন্নবা মহাক্কি লমজীঙ মখাদা হোৎনজরকপগী মহয়না মনিপুর লেজিসলেটিব এসেমব্লি দা পার্টি অসীগী কেন্দিদেট ৭ এম এল এ ওইনা মায় পাকপা ঙম্লকখিবনি।অদূবু মরম অমত্তা মাঙজৌননা খঙহনবা তৌদনা অনৌবা ওর্দর অমদা মনিপুরগী হান্নগী এম পি লোরহো এস ফোজে দা ষ্টেট য়ুনিট অসীগী প্রসিদেন্ট ওইনা হাপ্লকখিবনি হায়খি।
পার্টীগী মীওই খরনা মনিপুরগী মৈতৈশিংদা শোক্কদবা ৱাফম খরা ফোঙদোরকখিবদা য়ানিংবা ঊত্তুনা ৱা ঙাঙলুবা থৌদোক অমা লৈখি।মদুনা মরম ওইদুনা মহাকপু প্রসিদেন্ট ফমদগী লৌথোকপা ওইরম্বা য়াই হায়না জয়কুমারনা মখা তাখি।