মীয়াম্না নুংনাংবা ফোঙদোক্নরকপদগী সাইবরসেক্যুরিটি এপ্প ইন্সটোল তৌনবগী খোঙথাঙ হন্দোকখ্রে

মীয়াম্না শীজিন্নরিবা এন্দ্রোইদ মোবাইল ফোনশিংদা সঞ্চার সাথি মোবাইল এপ্লিকেশন হায়না খঙনবা সাইবর সেক্যুরিটি এপ্প অমমম হাপ্তুনা দিজিটেল ফ্রোদ চত্থবা থিংননবা, মীওই অমনা কনা-কনাগা ৱারী শানরিবগে হায়বনচিংবা ঈরায়-লায়না খঙদোক্তুনা মোবাইল ফোন্দা নমথাক তৌবগী থবকশিং লৈঙাক্না খঙদোক্তুনা মরাল লৈবশিংগী মথক্তা অকনবা এক্সন লৌখত্তুনা দন্দি পীবা য়ানবগী পান্দমদা, সেন্টর লৈঙাক্না টেলিকম্যুনিকেসন দিপার্টমেন্টগী খূত্থাঙদা থবক পায়খৎনবা থৌরাং অমা তৌরম্বদু মায়কৈ কয়াদগী মীয়াম্না য়ানিংদবা ফোঙদোক্নরকপদগী খোঙফম হন্দোকখ্রে।

মসীগী মতাঙদা পার্লিয়ামেন্টগী জেরো অৱারদা ঙরাং কংগ্ৰেসকি এম পি দিপেন্দ্র হুদানা পুখৎলদুনা,লৈঙাক্কি খোঙথাঙ অসী অচূম্বা নত্তে,মসীনা লন্নাই মীওইশিংগী অরোন-অথূপ থমজবদা,প্রাইভেসিদা খূৎ থিংজিনবা ওইনা থোক্কনি,কন্সটিট্যুসনগী ৱাংমদা থবক তৌবা ওইগনি হায়খি।অতৈ ওপ্পোজিসন মেম্বরশিংনসু য়াম্না কন্না য়ানিংদবা ফোঙদোক্নরক্তুনা হাওসতা চরাঙনবা থোরকখি।এম পিশিংগী ৱাফমশিং তারবা মতূঙদা টেলিকম্যুনিকেসন মিনিষ্টর জ্যোটিরাদিত্য ছিন্ধিয়ানা হায়, লৈঙাক্না ফগনি খন্দুনা পায়খৎনবা হোৎনরুবা থবক-থৌরম খূদিংমক পাঙথোক্তবা য়াদে হায়বা করিসু লৈতে।

অশোয়বা লৈগদবা ওইরবদি হান্না থোকখিবা ওর্দরশিং শেমদোক – শেমজীন তৌবা তাই।মখাতানা করি করম্বা মওংদা শেমদোকপা ‌য়াবগে হায়বদু য়েংশিল্লগনি হায়খি। কনাগুম্বনা মোবাইল হেন্দসেট হুরানখ্রবসু এপ্প অসী ইন্সটোল তৌরবদি ব্লোক তৌবা য়াগনি। দিজিটেল ফ্রোদ চত্থবা থিংননবা মরূওইবা পাম্বৈ অমসু ওইরগনি হায়বগী পান্দমদা এপ্প অসী ইন্সটোল তৌননবা লৈঙাক্না থবক পায়খৎলকখিবনি।