এম পি বিমোলবু লান্না উহন্নবা হোৎনরকপা লাইবক থীবনি : এম পি সি সি

হৌখিবা মে ২ দা ওল মনিপুর বার এসোসিয়েসন (অম্বা) না শীন্দুনা পাঙথোকখিবা এন আর সীগী সেন্সিটাইজেসন প্রোগ্ৰাম দা লোক সভাগী এম পি, দা.অঙোমচা বিমোল অকোয়জম্না ঙাঙখিবা ৱাফমদা মীওই খরনা মরাল শীরক্লিবদু য়ূম্ফম য়াওদবনি, মীয়ামদা লান্না উহন্নবা হোৎনরকপনি হায়না মনিপুর প্রদেশ কংগ্ৰেস কম্মিটিগী জেনরেল সেক্রেটরিসু ওইরিবা, কংগ্ৰেসকি ৱাঙাঙলোয় সেরাম নিকেন্না ফোঙদোকখ্রে।
বিটি রোদতা লৈবা কংগ্ৰেস ভবন্দা পাউমীশিংগা উনবগী থৌরমদা নিকেন্না ৱাফম অসী ফোঙদোক্লদুনা হায়, এম পি অঙোমচা বিমোলনা থৌরম অদুদা থমখিবদি, কুমশিং ১৯৫১ দা পাঙথোকখিবা এন আর সিগী দোক্যুমেন্ত অমত্তা লৈতে হায়না দিরেক্তরেট ওফ সেন্সস ওপরেসননা, আর টি আই অমগী পাউখুমদা ফোঙদোরকখ্রে হায়খিবনি। অতোপ্পা আর টি আই অমগী পাউখুমদা রেজিষ্ট্রার জেনরেল ওফ ইন্দিয়ানা মমাঙ চহী ২০২৫ গী মে ৩০ দা ফোঙদোরকখিবগী মতূঙ ইন্না, কুমশিং ১৯৫১ দা মনিপুরদা এন আর সি চত্থখিদে হায়না পাউখুম পীরকখি হায়বনি। আর টি আইগী পাউখুম অমা হায়বসি লৈঙাক্কি ওইনা য়াম্না মরু ওইবা দোক্যুমেন্ট অমনি।লৈঙাক্কি মরূওইবা দিপার্টমেন্ট অমনা মনিপুরদা কুমশিং ১৯৫১ দা এন আর সি তৌখিদে হায়না পাউখুম পীরক্লগা, মতৌ করম্না শুকলৈ লৈতবা দোক্যুমেন্টতা য়ূম্ফম ওইদুনা এন আর সি অপদেট তৌগদৌরিবনো হায়বা ৱাফম নিকেন্না থমখি।
এম পি বিমোলনা কুমশিং ১৯৫১ দা এন আর সি অপদেট তৌখি নত্রগা তৌখিদে হায়বা ৱাফম অমত্তা ফোঙদোকখিবা লৈতে। আর টি আই অনীগী পাউখুম মতূঙ ইন্না ওফিসিয়েল ওইবা দাটা অমত্তা লৈতে হায়খিবনি হায়না নিকেন্না শেংদোকখি।