হন্দক চৎলিবা দিসেম্বর থা অসীগী ২০ থাংজা নুমিৎতা তেংনৌপল দিষ্ট্রিক্টকী মনুং চনবা মোলনোম কুকি খুলদা টু ইঞ্চ মোর্টার অমা পোকখায়বনি হায়বা থৌদোক্তা খুল অদুদা লৈরিবা মচীন-মনাও য়াওনা অঙাঙ অহুম শোকহনখিবা থৌদোক অদূ মৈতৈ কম্যুনিটিনা থোকহনখিবনি হায়না কুকিশিংনা অকনবা মরাল থঙজীন্ননবা হোৎনবা লেপত্রি।তোঙান তোঙানবা,মৈতৈশিংগী মায়োক্তা ইশিনবা বেন্নরশিং পুরদুনা কুকি নূপীশিংনা মশীঙ হেনবা কুকি মীয়াম্না থৌদোক অদূ মৈতৈ কম্যুনিটিনা থোকহনখিবনি হায়না শন্দোক্নবা হোৎনদুনা প্রোটেষ্ট রেল্লি অমা তোর্বূঙদা চৎখ্রে।আই টি এল এফনা শীন্দূনা প্রোটেষ্ট রেল্লি অদূ চত্থখিবনি।
বফর জোনশিং ঈকায়খুম্নগদবনি হায়বা ৱাফমশিং কুকিশিংনা য়াম্না তোয়না পল্লদুনা মনিপুরদগী লমগী শরূক কয়ামরূম শেগায়রগা কুকিলেন্দ শেমহন্নবগী পোরম য়াৎপগী থৌওংশিং ঙাইহাক লৈতনা চত্থরক্লি। থৌওংশিং অসীগী মতাঙদা পেন্দবা ফোঙদোক্লদুনা য়ুনাইটেদ কম্মিটি পল্লেলনা ৱাফম কয়াসু থম্লক্লি।কম্মিটি অসীগী কনভিনর এম জিবন্না ফোঙদোকখিবা মতূঙ ইন্না,মোলনোমদা নুমিৎ অদূদা বোম কাপখিবগী নত্রগা পোকখায়বগী মখোল অমত্তা তাখিবসু লৈতে।
মদুগী অচূম্বা লংলা-লংজিন্দি পুলিস ওথোরিটিনা থিগৎলবা মতূঙদা খঙজরক্কদবনি। অঙাঙশিং অদূনা পায়দুনা শান্নরুবদা পোকখায়রকপা শোয়দনা ওইরমগনি খল্লি। সেক্যুরিটিগী অকনবা চেকশীন -থৌরাং লৌখত্তুনা ঙাক-শেন্দুনা লৈরিবা মোলনোম কুকি খুলদা মৈতৈনা চঙশীল্লক্লগা বোম পোকখায়হনবনি হায়রকপসি কুকিশিংনা মহৌশাদগী মশানা মরাল লঙজরগা মৈতৈদা থঙজীনবগী হৈনবি অদূমক্নি।মসীদা করিসু ঙক্নিঙায় লৈতে হায়খি।মসীগুম্বা য়ূম্ফম য়াওদবা মরাল থঙজীনবগী থবক থৌওং অসী খূদক্তা লেপত্রবদি হান্নদগী টেন্সন ৱাংনা লৈরিবা মনিপুরদা ঈঙ-তপ্পা শক্তম পুরকপা ঙম্লোই হায়রক্লি।মোলনোম কুকি খুলদা বোম পোকখায়খিবনি হায়বা থৌদোক্তুদা শোকখিবা অঙাং অহুমদূগী মনূংদা অমদি খোঙ নাম্মা ককপগী ফীভমদা লৈরিবনি।