মীয়ামগী শেন্থোক লম্বী অমমম পীনবগীদমক এম এস এম ই মিনিষ্ট্রি লিংখৎখিবনি: য়োইরেনতোম্বা

মশানা মশাবু থবক পীজনবা থৱায় য়াওনা শিনফম অমমম পায়জরিবা ওন্ট্রপ্রিন্যরশিংদা শেল, থবক্কি লৌশিং -গ্যান অমদি অতৈ মখল কয়াগী পোৎলমশিং পীদুনা মতেঙ পাংনবগীদমক ইন্দিয়া লৈঙাক্না মিনিষ্ট্রি ওফ মাইক্রো, স্মোল এন্দ মেদিয়ম এন্তর্প্রাইজেস হায়রিবা অসি লিংখৎলকখিবনি।মিনিষ্ট্রি অসীনা মশানা মশাবু থবক পীজবগী শিনফমদা শূ-নোমদুনা মশাগী,ঈমূঙ-মনূঙগী অমদি অতৈ মীওইশিংদা থবক পীদুনা শেন্থোক হেনগৎহন্নবা হোৎনরিবা ওন্ট্রপ্রিন্যরশিংদা লেপ্পা লৈতনা মখল-মখা কয়াগী তেঙবাং পীরি।লাইরিক লাইশু হৈরবা অমদি লাইরিক নীংথীনা তমহৌদ্রবসু খূৎহৈবা শিনফম অমদা থবক তৌদুনা শেন্থোক লম্বী অমমম লৈননবা হোৎনবা পাম্বা নহারোলশিংনা মিনিষ্ট্রি অসিদগী শেলগী অমসুং অতৈ মখলগী মতেং লৌবা য়াই হায়না এম এস এম ই টেক্নোলোজি ইম্ফালগী দিপ্যুটি দিরেক্তর দা.সিনাম য়োইরেনতোম্বা মৈতৈনা ফোঙদোকখ্রে।
মিনিষ্ট্রি ওফ মাইক্রো স্মোল এন্দ মেদিয়ম এন্তর্প্রাইজেসকী দেভেলপমেন্ত কম্মিস্নর না স্পোন্সর তৌদুনা ইম্ফাল ইষ্ট দিষ্ট্রিক্টকি নিলকুথি ফুদপার্ক তা ওফিস হাংদুনা লৈবা এম এস এম ই-টেক্নোলোজি সেন্তর ইম্ফালনা ৱাংজিং-তেন্থা সিদি ব্লোক্কি মনূংদা লৈবা থৌনা ভি এল এফ, লৈমরেম্বি ভি এল এফ, লৈশেম্বা ভি এল এফ অমদি নিঙোল ক্লব হৈরোক্কা খূৎশম্নদুনা পাঙথোকখিবা নোংমগী ওইবা এৱের্নেস প্রোগ্ৰাম দা শরূক য়ারদুনা য়োইরেনতোম্বনা ৱাফম অসী ফোঙদোকখিবনি।
ৱিমেন সেল্ফ হেল্প গ্রুপ বিজিনেস এম্পাৱরমেন্ত হায়বা থিমদা পাঙথোকখিবা নোংমগী ওইবা এৱ্যের্নেস প্রোগ্ৰাম অদু হৈরোক পার্ট -থ্রী দা লৈবা ঙারৌথেল কম্যুনিটি হোলদা ঙরাং পাঙথোকখিবনি।