কংগ্ৰেসনা লুচিংবা, মতম অমগী সেন্টরদা লৈঙাক-সাসন পায়রম্বা য়ু পি এগী মতমদা লৈবাক অসীগী লায়রবা মীয়ামগীদমক হৌদোক্লম্বা মহাত্মা গান্ধী নেসনেল রুরেল এমপ্লোইমেন্ট গরেন্টি স্কিম (এম জি এন আর ই জি এস) হায়না খঙনরিবা,মালেমদা খ্বাইদগী চাউরবা এমপ্লোইমেন্ট গরেন্টি স্কিম অসী হন্দক বি জে পিনা লুচিংবা এন দি এ লৈঙাক্না নৌনা ভিক্সিট ভারত জি রাম জি হায়না মমীং হোংদোক্লগা বিল ওইনা পুথোক্তুনা এক্ট ওন্থোকখিবা থৌওং অসী কংগ্ৰেস পার্টিগী মায়কৈদগী য়াম্না হকচীন্না লৌই,খম থেংনা য়ানিংদে হায়না মনিপুর প্রদেশ কংগ্রেস পার্টিগী লুচিংবা অমসুং সি এল পি লীদর ওক্রম ইবোবিনা পাউমীশিংদা ফোঙদোকখ্রে।
মনিপুরগী হান্নগী চিফ মিনিষ্টর অসীনা ঙরাং ইম্ফালগী বি টি রোদতা লৈবা কংগ্ৰেস ভাবন্দা পাঙথোকপা পাউগী মীফম অমদা ৱাফম অসী ফোঙদোক্লদুনা হায়,সেন্টরদা লৈরিবা বি জে পিনা লুচিংবা এন দি এ লৈঙাক্না মহাত্মা গান্ধীগী মমীং হোংদোক্লগা রামগী মমীং ওন্থোকখ্রিবা থৌওং অসী অঙকপা ফাওই।ফন্দিং পেট্টর্ন ফাওবা হোংদোক্তুনা চত্থরক্লিবা বি জে পিগী থৌশিল অসীদি লৈবাক অসীদা লৈরিবা লায়রবা মীয়াম শিজরো হায়বগা পাঙ্খক্নি। ঙসীগী মূক্নবনা থল্লবা মালেম অসীদা মহাত্মা গান্ধীগী নোন-ভাইওলেন্স অমদি মহাক্কি মূৎনায়ররোইদবা প্রিন্সিপলশিং,আইদিওলোজি কয়াদু হেন্না হেন্না চূনরকপদগী ঙসীদি য়ু এন ও ফাওবনা ফাদর ওফ দি ইন্দিয়ান নেসন হায়না খঙনরিবা মীশক অসীগী মপোক নুমিৎ ওক্তোবর অনীনা লাকপদা চহী খূদীঙগী ইন্টর্নেস্নেল দে ওফ পিস হায়না পালন তৌনরিবনি হায়খি।
বি জে পিনা ঙম্মি মতাগুম চত্থরক্লিবা লমহেন-তুহেনবগী থৌওংশিং অসি নোংমদি মীয়াম্না পারা তম্বিরকখিগনি হায়না ইবোবিনা ফোঙদোকখি।