অমেরিকান ওনকোলোজি ইন্সটিটিউট না মনিপুর য়াওনা লৈবাক অসীদা কেন্সর ট্রিটমেন্ট সেন্টর ৯০ লিংখত্তুনা ৱারল্ড ক্লাসকি এদভান্স ট্রিটমেন্ট পীবা ঙম্লে অদুগা অখন্ননা মনিপুরদা এদভান্স সর্জিকেল ওনকোলোজি থীয়েটর হাংদোক্নবগী পান্দমসু থম্লি হায়না অমেরিকান ওনকোলোজি ইন্সটিটিউট কি চ্যেরমেন দিলিপ মাংশুলিনা মনিপুরগী গভর্নর অজয় কুমার ভাল্লাগী মফমদা পাউদমখ্রে।
ঙরাং রাজ ভবন্দা পাঙথোকখিবা নোরথ ইষ্ট ইন্ডিয়াগী ওইনা কেন্সর ক্যেরগী ফীভম ফগৎহনবগা মরী লৈনবা মীফমদা মাংশুলিনা ৱাফম অসী গভর্নরগী মফমদা থম্লদুনা পাউদমখিবনি। কেন্সর ইন্সটিটিউট কি ওফিসিয়েল কয়াসু মীফম অদুদা শরুক য়াখি। হৌজিক রিলিফ কেম্প শিংদা অৱাবা, খুদোংচাদবশিং মায়োক্নরগা লৈরিবা ইন্টর্নেল্লি দিসপ্লেস পার্সন (আই দি পি) শিং অসীগী হেল্থক্যের অমসুং অতৈ খুদোংচাদবশিং কোকহন্ননবগী মতাঙদসু মীফম অদুদা খন্নখি।
মখা তারকপা ওইনা গভর্নরনা রিলিফ কেম্পশিংদা লৈরিবা লাঞ্জেন্নরক্লবা মীয়ামগী মীহুৎশিংগা রাজ ভবন্দা উনদুনা, হৌজিক আই দি পিশিংনা মায়োক্নরিবা অৱাবা খুদোংচাদবা কয়াগী ৱাকৎশিংসু পূক্নীঙ চঙনা তাবিখি। মখোয়না থেংনরিবা খুদোংচাদবশিং অথূবা মতমগী মনূঙদা কোকহন্ননবা মহাক্কি লৈঙাক অসীনা অঙম্বা থাক্তা থবক পায়খৎলি হায়না মীহুৎশিং অদুদা খঙহনখি।