মনিপুরগী ঈরাং অসীনা চাওখৎ-থৌরাংগী থবকশিং থীন্থহল্লে: দিরেক্টর

হৌখিবা কুমশিং ২০২৩ গী মে ৩ দগী হৌজিক ফাওবদা লেপ্পা লৈতনা মখা অসুম শমথদুনা লাক্লিবা ঈরাং অসীনা ষ্টেট অসীগী চাওখৎ-থৌরাংগা মরী লৈনবা প্রোজেক্টশিং পায়খৎপদা য়াম্না চাউনা থীন্থহল্লে হায়না মনিপুর লৈঙাক্কি রুরেল দেভেলপমেন্ট এন্দ পঞ্চায়েটি রাজ (আর দি এন্দ পি আর) গী দিরেক্টর কে এস ঐচ উমানন্দনা ফোঙদোকখ্রে।
চাং নাইনা ইম্ফালগী নিট্যাইপাৎ চুথেক্তা লৈরিবা দিরেক্টরেট ওফ ইনফোর্মেসন এন্দ পব্লিক রিলেসন্স (দি আই পি আর) গী ওদিটোরিয়মদা পাঙথোক্লিবা মিট দি প্রেস থৌরমদা ঙরাং দিরেক্টরনা ৱাফম অসী ফোঙদোকখিবনি। মহাক্না হায়, ঈরাং অসীনা মরম ওইরগা চাওখৎ-থৌরাংগী থবকশিংদা থীন্থহনবগা লোয়ননা ষ্টেটকি ইকোনোমিদা অচৌবা চৈথেং পীরি। চীঙ অমদি তম্পাক্লমদা পায়খৎকদবা সেঙ্কসন প্রোজেক্ট কয়া পায়খৎপা ঙমদনা পন্থদুনা লৈরক্লি।লম্বী-থোংগী ওইনা য়েংলুরবসু অনৌবা লম্বী-থোং শেমগৎনবা ৱার্ক ওর্দর ময়াম লৈরবনি অদূবু কাঙলূপকি ঈরাং অসীনা মরম ওইরগা থবক হৌবা ঙমদনা লৈরি। ঈরাং অসীগী মমাঙদা থবক শূবা হৌজিনখ্রবা লম্বী কয়া হৌজিক মখাতানা থবক শূবা ঙমদবদগী চপ লেপতুনা লৈরি হায়খি।
থৌরমদুদা শরূক য়াখিবা মনিপুর লৈঙাক্কি রুরেল ইঞ্জিনিয়ারিং দিপার্টমেন্টগী চিফ ইঞ্জিনিয়র তেম্বনা চপ মান্নবা ৱাফমশিং ফোঙদোক্লদুনা হায়, পি এম জি এস ৱাইগী ফেজ ৩ ফাওবগী মখাদা পায়খৎলিবা খুঙ্গংশিংগী লম্বী-থোং শেম্বগী থবক অয়াম্বা, কুমশিং ২০২৩ দগী থোক্লক্লিবা ঈরাং অসীনা মরম ওইরগা খোঙলৈ তপখ্রে। মমল য়াম্লবা মেছিন্নরি কয়াসু ঈরাং মরক্তা শকখঙদবশিংনা তুম্না মৈ থোদোকপা য়াওখ্রে হায়খি।