থৌবাল দিষ্ট্রিক্টকী মনূঙচন্না খাঙবোক্তা লৈরিবা কে এম ব্লুমিং হায়র সেকেন্দরি স্কুলগী ওইনা চহী খূদীঙগী চত্থদুনা লাক্লিবা এন্নুয়েল স্পোর্তস মিট, চৎলিবা কুমশিং ২০২৬ অসীদসু ৩৮ লক শুবা ওইনা স্কুল অসীদা ঙরাং হৌদোকখ্রে।
স্পোর্তস মিট অসী নুমিৎ নিনী চঙনা পাঙথোক্কনি হায়রি। স্কুল অসীগী প্রিন্সিপাল দা. রোমেনকুমার মঙাংনা লুচিংবা মহৈরোয় অমদি স্কুল অসীগী ওজাশিংনা শরুক য়াদুনা খাঙবোক পার্ট -টু দা লৈরিবা, ঈকোপ নিংথৌ হরাওবূং শঙলেনগী চ্যেরমেন মেঞ্জর মঙাংনা মৈরা চূখত্তুনা পুরক্লবা মতূঙদা স্কুল অসীগী অহানবা শঙলেন্দা চ্যেরমেনগী লৈখিদ্রবা অপোকপা অমদি অপোকপীগী খুভমদা ঈকায়খুম্নবা উৎখি।
মদূগী মতূংদা স্কুলগী অনীশুবা শঙলেন্দা পুরক্তুনা মৈরা কৎলবা মতূঙ স্পোর্তস মিট অদূ ফোর্মেল ওইবা মওংদা হৌদোক্লে হায়না চ্যেরমেন না লাউথোকখি। হৌদোকখিবা নুমিত্তা মহৈরোয়শিংনা মখল কয়াগী মশান্নশিং শান্নখি।