জুন্টা লৈঙাক্না মিলিটরি সাসন মূত্থৎখ্রে, দিসেম্বরদা মীখল পাঙথোক্ননবা খোঙথাঙ পায়খৎখ্রে

কুমশিং ২০২১ গী ফেব্রুয়ারি থাগী অমদা মতমদুগী দিমোক্রেটিক সিভিল গভর্নমেন্ট অমা মীখলদা মায় পাক্তুনা ৱাশক লৌননবগীদমক থৌরাং তৌদুনা লৈরকখিবা, ওং সান সূ চিনা লুচিংবা লৈঙাক অদূ কূ তৌদুনা মিলিটরি জুন্টাগী লুচিংবা মিন ঔং লায়িংনা মিলিটরি সাসন তৌদুনা লাকখিবদু মূত্থৎখ্রে। অসীগুম্বা মিলিটরি জুন্টাগী সাসন অমা শেম্নবগীদমক দেমোক্রেটিক সিভিল গভর্নমেন্ট শেমগদবগী মতম ঙাইদুনা লৈরকখিবি লুচিংবী ঔং সান সূ চিবু কূ তৌদুনা ফাজিনখিবগা লোয়ননা প্রো-দেমোক্রেসিগী অতৈ মকোকথোংবা লুচিংবা কয়াসু ম্যান্মারগী মিলিটরি জুন্টাগী লুচিংবশিংনা ফাজিন্দুনা ঙসীফাওবা জেলশিংদা নমশীন্দুনা থম্লক্লিবনি।

মসীগীদমক পেন্নদ্রবা ম্যান্মারগী মীয়াম্না ঔং সান সূ চিগী মীচঙদা লেপ্তুনা অকনবা ঈরাঙ হৌরক্তুনা মিলিটরি জুন্টাগী মায়োক্তা লান হৌরকপদগী লৈবাক অসী খুন্তাক-লান্সিরবা, মীওইবা খুন্নাইনা লৈনদ্রবা, ভূৎ প্রেটকি লমদম অমা ওইদুনা মীশী-মীনা, মীকপ মীরাওখোলনা নিন্দুনা লৈরক্লিবনি। মীচম মীয়াম পাক্তক্ননা অঊ- অঊবা পূম্নমক মিলিটরি জুন্টাগী লান্মীশিংনা হাৎলকপা, অদুগা অমরোমদনা মখোয়গী মায়োক্তা লাল হৌরিবা লালহৌবশিংনসু জুন্টাবু শৌগৎপা মীচমশিং হেক উবগা হাৎপগী থবক চত্থরকপদগী মীওই লীশীং কয়া য়ূমথঙনরিবা ইন্দিয়া, বংলাদেস, থায়লেন্দ নচিংবা লৈবাকশিংদা হৌজিক লাঞ্জেল্লক্তুনা চঙজফম লৌরগা লৈনরি।

চৈরকশিদা জুন্টাগী মচীন চৎপা স্পোক্সপার্সন জাউ মিন টুন্না লাক্লিবা থা তরুক্কি মনূঙদা মল্টি-পার্টিশিংগী ইলেক্সন পাঙথোক্লগনি, মিলিটরি সাসন মূত্থৎলে হায়না লাউথোরকখিবনি। মদূ জুন্টা লান্মীনা লৈবাক অদূবু শূপ্পায় পায়শীনবা য়াননবা চত্থরকপা নমথাক্নি হায়না ওপ্পোজিসনশিংনা ফোঙদোরকখ্রে লোয়ননা ইলেক্সন অদূ বোইকোৎ তৌগনি হায়রি।