হৌজিক নোংজুথা চঙলকপগা লোয়ননা ইম্ফাল সহর ময়োল অমদি মসিদগী ইরাপ লাপ্তনা লৈরিবা অকোয়বা মফমশিংদা লম্বীশিংগী ফীভম, ঙরাং ফাউন্দেসন ফোর রুরেল অর্বান দিবেলপমেন্তকি প্রসিদেন্ট এল তোম্বনা মহাক্কি টিমগা লোয়ননা কোয়না চত্তুনা য়েংশিনখ্রে।
মতম কয়াগী মমাঙদগী মীয়ামগী, মরূ ওইনা খুদোংচাদ্রবা, লৈতা-লায়রবা কয়াগী য়াইফা-থৌরাংশিং পায়খত্তুনা লাক্লিবা সোসিয়েল এক্টিভিষ্ট অসীনা ইম্ফালগী অকোয়বদা হৌজিক য়াম্না ফীভম ফত্তনা লৈরিবা লম্বীশিং উরুবদা অঙকপা ফাওবগা লোয়ননা মরী লৈনবা অথোরিটিগী মথক্তা পেন্দবা ফোঙদোকখিবনি।
ইম্ফালগী কোনুং মমাঙ ক্রোসিংদগী মিনুথোং হট্টাগী লম্বী অসী মমাঙথংবা নাকলগী শরূক্তি শেমখ্রবসু নোংচুপথংবা, মনীংথংবা নাকলগী শরূক্তি লৈখোম-লৈনাং, ঈশীংনা মরম ওইদুনা মীয়াম খোঙনা অমসুং গারি থৌদুনা চৎপদা খুদোংচাবা চাউনা মায়োক্নরি। অমরোমদা, পোরোম্পাৎ পোং লম্বীগী শরূকশিং, কোংবা তুরেল মপানগী লম্বী, টি ভি টৱার তাবা লম্বীনচিংবা অসী, মীওইবদি লায়রদনা শা-শন ফাওবা চৎপদা খুদোং থীনিঙায় ওইরে। লৈঙাক্না ঙাইহাক ঙাইহাক্কি কৈথেল নংনবগী মওংদা থবক তৌবগী মওং অসীদি থাদোকপিবা চুমগনি হায়না সোসিয়েল এক্টিভিষ্ট অসীনা পেন্দবা ৱাফম ফোঙদোকখি।
লম্বীশিং অসী মতৎ-মতৎ, মতেক মতেক শেম্বা হৌরম্লগা তনবদগী তোকথোকখিবা মানবা থৌওং অসী মীয়াম্না খম থেংনা পেন্নদ্রে হায়বা ৱাফম তোম্বনা থমখি। অথূবা মতমদা ফীভম ফত্তনা লৈরিবা লম্বীগী শরূকশিং অসী লৈঙাক্না অকনবা মীৎয়েং চঙদুনা শেমজীনবিয়ু হায়না সোসিয়েল এক্টিভিষ্ট অসীনা আপিল তৌরকপগা লোয়ননা ফীভম অসীদা অসুম থম্লবদি খোয়শাওনরবা মীয়াম্না পামদবা খোঙজঙ চঙশীল্লক্লবদি অফবা ওইরক্কদবা মান্দে হায়খি। মীয়াম্না অকনবা ঈহৌ, বন্দ-ব্লোকেদকি খোঙজঙ চঙশীন্দ্রিফাওবা মীয়ামগী খোল্লাউ তাদবগী হৈনবি কলচর অমা লৈঙাক অসীদা লৈরি। মসী থাদোকপনা অচূম্বা ওইগনি হায়খি।
লৈঙাক অসীনা মরী লৈনবা লোয়শঙশিংগী ওফিসিয়েলশিং থাদোক্লগা গ্ৰেটর ইম্ফালগী অকোয়বদা ইন্সপেক্সন চৎহন্দুনা হৌজিক ইম্ফালগী অকোয়বদা লৈরিবা লম্বীশীং অসীগী ফীভম করম তৌরিবগে হায়বদু য়েংশিলহন্দুনা অথুবা মতমদা লম্বীশিং অসী শেমজীনবিয়ু হায়না মহাক্না লৈঙাক্তা তকশীনখি।
