ফৌবৈ মৈ থাদুনা মীয়ামগী পূকচাক থদৎলিবা মীফত্তশিং অকনবা চৈরাক পীয়ূ: এল এম জি

চহী অমা চূপ্না,নোংজু -নুংশা কয়া মায়োক্নদুনা লৌমীশিংনা য়াম্না ৱানা হোৎনদুনা লৈখোম -লৈনাঙ মরক্তা লৌ উরগা মনিপুর মীয়ামগী নোংমদা চঙদ্রবা য়াদ্রবা,মীওইবগী থৱায় ওইরিবা চেং পুথোক্তুনা চানরিবনি ।মীওইবগী থৱায় হিংনরিবনি।মতৌ অসূম্না য়াম্না ৱানা হোৎনদুনা ফৌ ওইরবা মতমদা লৌবূক্তা ফৌবৈ পৈদুনা থম্লবা মতমদা পুন্সিগী মমল খঙদবা,শা- ঙাদগীসু হেন্না পূকচেল তমথিরবা মীওই খরনা হৌখিবা চহী খরা অসীদা লৌবূকশিংদা লোন্না চৎলগা ফৌবৈশিং মৈ থাদুনা মাঙহনবগী থৌওং কয়ামরুম চত্থরক্লিবা অসী মীওইবা খুন্নাইগী খ্বাইদগী চাউরবা য়েক্নবনি হায়দবা য়ারোই।

হন্দকসু লমশাং কেন্দ্রগী মনূঙচন্না লমশাং ময়ায় লৈকায়দা লৈবা হুন্দবি লৌকোলদা, খাওবা লোইরদুনা য়ৈননবগীদমক পৈখত্তুনা থম্লবা,থাংজম মহাবির (৫১) গী ফৌবৈ শকখঙদবশিংনা নুংদাংগী মতমদা মৈ থাদোক্তুনা তুম্না মাঙহনখিবা অসী মীওইবা খুন্নাইগী থৱায় হিংথৎ- থদৎপনি হায়না লৌবদা লাল্লরোই।মরম অদূনা ফত্রবা থৌদোক অসীদা হকথেঙননা অমদি নাকোয়ননা চেন্নরিবা খুন্নাইগী মহীকশিং অসী থিদোক্তুনা লৈঙাক্না অকনবা আইনগী চৈরাক ফংহল্লু হায়না লাইক মাইন্দেদ গ্ৰূপ (এল এম জি) মনিপুরগী পব্লিসিটি সেক্রেটরি রাকেস নাউরেম্না অকনবা ৱাফম ফোঙদোক্তুনা কন্দেম তৌখ্রে।

ঙরাং অৱাবা তারবা মহাবিরগী লোয়নবি য়ূম্নাম নিঙোল মেমথোইগী মফমদা শেলগী তেঙবাং পীখিবা থৌরমদা রাকেসনা মহাক্কি ৱাফম অসী ফোঙদোরকখিবনি।থৌরমদুদা গ্ৰূপ অসীগী জেনরেল সেক্রেটরি ওজিৎ সোরোকখাইবম,ট্রেজরর কুঞ্জেশ্বর মংশাতাবম,এসিষ্টেন্ট সেক্রেটরি সুরেন্দ্র নিঙোম্বা অমসুং মেম্বর জয়কুমার থোকচোমসু শরূক য়াখি।