দাইমন্দ দোনর্স না ট্রোংলাউবীদা লৈবা অৱাবা তারবা ঈমূংদা শেলগী মতেং পাংখ্রে

হন্দক বিষ্ণুপুর দিষ্ট্রিক্টকি মনূঙচন্না লৈরিবা ট্রোংলাউবী অৱাং লৈকায়দা লৈবা ঈমূঙ অমদা কুকি মিলিটেন্টশিংনা বোম কাপশিন্দুনা পীক্লিবা অঙাং অনী হাৎখিবা অমসুং মখোয়গী অপোকপী মমাবু তমথীনা শোকহনখিবা থৌদোক অদুদা অৱাবা তারবা অঙাং অনীগী ঈমূংগী মীওইশিংদা দাইমন্দ দোনর্সনা চত্তুনা ঙমজবা শেলগী মতেং পাংখ্রে। কুকি -জো মিলিটেন্টশিং ওইগনি চিংনবা খূৎলায় মতীকচানা পায়বশিংনা অহীঙ নোংয়াই মতূঙ পূঙ অমা মখায়রোম তারকপা মতমদা রোকেট প্রোপেল্ড গ্ৰেনেদ কাপশিন্দুনা পীক্লিবা অঙাং অনী, ওইনাম তোমথিন (চহী ৫) অমদি মচন্নূপী ওইনাম য়াইস্না (থা ৫) বু তমথিবা মীহাত্তা হাৎতোকপিখিবনি।

তেঙবাং পীবগী খোঙচৎ অদূদা লুচিংখিবা, দাইমন্দ টি ভি অমসুং ৱাহোঙ রেদিওগী মেনেজিং দিরেক্টর ওইনা লৈরিবা জেম্স হৈক্রুজম্না তেঙবাংগী শেনফম লূপা ৩০,০০০ খক, লৈখিদ্রবা অঙাঙশিং অদূগী অপোকপা ওইনাম মঙালঙম্বগী মফমদা খূৎশীন্নখি। দাইমন্দ দোনর্স কি মেম্বরশিং অমদি ট্রোংলাউবীগী ঈমা-ঈবেলশিংসু শরূক য়াখিবা থৌরমদুদা জেম্স হৈক্রুজম্না হায়, লৈখিদ্রবা ঈচা অনীগী অপোকপা ওইনাম মঙালঙম্বা অসী দাইমন্দ দোনর্স কি মেম্বর অমা ওইবগী মথক্তা মহাক্কি অহল-লম্মনশিংসু মেম্বর ওইদুনা অৱা-অনা কয়াগী মতেং পাংদুনা লাকখিবনি। লৈখিদ্রবা ঈচা অনীগী থৱায় মীরেলনা অপোকপা মপা-মমাগী মথানুংদা অমূক হল্লক্তুনা অনৌবা মপোক অমা পোক্লকপা ওইরসনু হায়বা ৱাফম জেম্স হৈক্রুজম্না ফোঙদোকখি।

মীয়াম্না অৱাবা ফোঙদোকমিন্নখিবগা লোয়ননা তাইবং মপুগী খূয়াখাদা অঙাঙ অনীগী থৱায়না ঈংনা-চীক্না লৈরুবা ওইরসনু হায়নসু পূন্না থৌনিজখি।হৌখিবা চহী মাপল্লোমগী মতমসিদা দাইমন্দ দোনর্সকি মেম্বরশিংনা থা খূদীংগী লূপা ১০০/১০০ খায়গৎনরগা অৱাবা খুদোংচাদবা কয়া মায়োক্নরবা মীওইশিং অমসুং দাইমন্দ দোনর্স কি মেম্বরশিংনা খুংদোংচাদবা মায়োক্নরকপদা ওন্সীন্দুনা মতেং পাংনদুনা লাক্লি।মতূঙদসু লেপ্তনা তেঙবাংবগী থবক চত্থখিগনি হায়না জেম্স না ফোঙদোকখি।