ক্রোস ফয়ারিংদা কুকি- জো কাঙলূপকি নূপী অমা শিরে, ঈরাঙ হৌরকখ্রে

বিষ্ণুপুর দিষ্ট্রিক্ট কি মনূঙচন্না লৈরিবা ফূবালাদা মশাগী লৌবূক্তা থবক শুদুনা লৈবা নিংথৌজম বিরেন কৌবা অহল অমা কুকি- জো কাঙলূপকি মিলিটেন্টশিংনা নোংমৈ কাপশীল্লকপদা ওইথংবা খূদাংদা পান্দুনা শোকপদগী বিষ্ণুপুর দিষ্ট্রিক্ট হোস্পিটালদা পুখত্তুনা লায়কন্নখ্রবা মতূঙদা সেন্ট্রেল সেক্যুরিটি ফোর্স অমসুং কুকি- জো মিলিটেন্টশিংগী মরক্তা চত্থখিবা ক্রোস ফয়ারিংদা কুকি- জো কাঙলূপকি নূপী অমা নোংমৈনা পানবদগী লৈখিদ্রে।

চুরাচান্দপুর দিষ্ট্রিক্ট কি মনূঙচন্না লৈরিবা লাংচীঙমানবী খুলগী ভিল্লেজ চিফকি লোয়নবি খোইখোলিং কৌবী অদূ নোংমৈনা পানবদগী শিখিবনি। মীশী অদূবু য়ানিংদবা ফোঙদোক্তুনা আই টি এল এফ অমসুং অতৈ লূপশিংনা কৌখিবা টোটেল সটদাওনগী খোঙজঙনা মরম ওইদুনা চুরাচান্দপুর দিষ্ট্রিক্ট তা মহৌশাগী পুন্সিদা চাউনা অকায়বা থোকহনখি। কাংপোকপিদসু কোতুনা ঙরাং নুংথিল পূঙ ১ তাবদগী নুমিদাংৱাইরম পুঙ ৬ ফাওবা বন্দ তৌখি।

নাকল অমরোমদা কুকি- জো মিলিটেন্টশিংনা লৌমীশিংদা টারগেট তৌরকপদা নিংথৌজম বিরেন কৌবা অহল অমা নোংমৈনা পানবদগী শোকহনখিবা থৌদোক অদূবু য়ানিংদবা ফোঙদোক্তুনা ফূবালা মায়কৈগী মীয়াম্না মতম কক্তনা বন্দ চত্থরগনি, মরাল লৈরবা কুকি- জো কাঙলূপকি মিলিটেন্টশিং ফাগত্তুনা আইনগী ওইবা চৈরাক পীদ্রিবফাওবা বন্দগী খোঙজঙ হন্দোক্লোই হায়না লাউথোকখিবা অদূ লৈঙাক্কি অথোরিটিগা কন্দিসন খরদা য়ানবা পুরকপদগী হন্দোকখ্রে।

বিষ্ণুপুর দিষ্ট্রিক্টকি দি সি পুজা এলাংবম অমসুং এস পি রবিকুমারনা মীয়ামগী অপাম্বা খূদীঙমক থবক্তা ওন্থোক্কনি হায়না থাজবা পীবদগী মতম খরগী ওইনা খোঙজঙ অদূ হন্দোকখিবনি। থবক্তা ওন্থোরক্ট্রবদি মখাতানা খোঙজঙ চঙশীনগনি হায়রি।