কোব্রাগা কাপ্নবদা নাগা ভল্লন্টিয়র অমা শিরে, জে টি সিনা নেস্নেল হায়ৱেশিং থিংজিনখ্রে

সি আর পি এফকি কোব্রা কম্মান্দোশিংনা ঙরাং অয়ূক অঙনবদগী হৌনা নোনে দিষ্ট্রিক্টকি বিটিয়াং ভিল্লেজদা লৈবা নাগা ভল্লন্টিয়রশিংগী ত্রেনিং তৌফমদা অকনবা এট্টেক চত্থরক্তুনা লান্দারকপদা নাকল অনীগী মরক্তা খূৎ থোক্নরকপদগী নাগা ভল্লন্টিয়র অমা শিরে অদূগা নাগা ভল্লন্টিয়র ২ , অমসুং কোব্রা কম্মান্দো ২ সু শোক্লে হায়রি।
মশীঙ য়াম্লবা কোব্রা কাঙবূ অদূনা মফম অদূ য়াওনা অকোয়বদা লৈরিবা মফমশিং কোয়শীন্দুনা লৈখিবা মরম্না থৌদোক অদুদা মীওই কয়া য়াম্না শোকখিবগে, নান্থোকখিবনা কয়ানো অমদি মী কয়া ফাগৎখ্রবগে হায়বগী রিপোর্ট ফংবদি ঙম্নদ্রি। অদূম ওইনমক খুল অদুদা নাগা ভল্লন্টিয়র ৩০ খরা হেন্না লৈরমগনি হায়না পানরি।
লৈখিদ্রবা নাগা ভল্লন্টিয়র অদু নোনে বজারদগী লাম্বি রিয়ামৈ (২১) কৌই হায়রি।
ঙরাং অয়ুক পূং ৬ লোম তারকপদা সি আর পি এফকি কোব্রা য়ূনিট কি পার্সনেল কয়ামরুম চঙশীল্লকপা উখি। মফম অদূ কোয়শিল্লগা ওপরেসন চত্থরকখিবনি। মফম অদূগী খুঞ্জাশিংগা কোব্রা কম্মান্দোশিংগা অকনবা মওংদা মূক্নরকখি, টিয়র গ্যাস সেল কয়ামরুম কাপখি। জোইন্ট ট্রাইব কাউন্সিল গী ৱার্কিং কম্মিটিনা খঙহল্লকপা অমদা, কোব্রা কম্মান্দো টিম অমনা ঙরাং অয়ূক চতত্থরকখিবা থৌওং অদূবু য়ানিংদবা ফোঙদোরকপগা লোয়ননা খূদক্কি ওইনা নেস্নেল হায়ৱেদা বন্দ চত্থদুনা, মতম কক্তনা অথিংবা থম্লে হায়না লাউথোকখ্রে।
রেলৱে প্রোজেক্ত য়াওনা নেস্নেল প্রোজেক্ট পূম্নমকসু মতম কক্তনা অথিংবা থম্লে হায়না লাউথোকখ্রে। ভিল্লেজ ভল্লন্টিয়র হাৎপশিংগী মথক্তা অকনবা থবক লৌখত্রিমখৈ অথিংবা অসী লৌথোক্লোই হায়রি।