চ্যুলুৱান-২ রসিয়াদা থুংখ্রে

মনিপুরগী তমেংলোং দিষ্ট্রিক্ট তা মমাঙ চহীগী নবেম্বর ৮ দগী হৌদোকখিবা অমুর ফাল্কোন ফেষ্টিবেল মনূঙদা সেট্টেলাইট টেগ তৌরবা মতূঙদা থাদোকখ্রবা মতূঙ, মনিপুরদগী অহীঙ নুংথিল লেপ্পা লৈতনা পাইদুনা চৎখ্রবা চ্যুলুৱান- ২ হায়না খঙনরবা মাইগ্ৰেটরি বার্দ মখল অমা ওইরিবা অমুর ফাল্কোন কৌবা উচেক লাবা অদূ হৌজিক কিলোমিটর ৬০০০ লাপ্না অৱাংলোমদা পাইখিদুনা রসিয়াদা থুংখ্রে।

মহাক্কা লোয়ননা সেট্টেলাইট টেগ তৌমিন্নখিবা গ্বানগ্ৰাম হায়না মিংথোনবা অমুর ফাল্কোন অমোম অদুদি হৌজিক ট্রান্সমিসন মাঙখিবদগী কদায়দা লৈখ্রবগে হায়বদু খঙখিদ্রে হায়রি। উচেক অমোম অদূ মনিপুরদগী কেনয়া ফাওবা পাইখ্রবা মতূঙদা মফম অদুদা লমদন্দুনা লৈখ্রে হায়বা ফাওবদি খঙবা ঙমখি অদূম ওইনমক মফম অদূদগী হৌজিক কদায়দা পাইখ্রবগে হায়বসি ট্রান্সমিটর ফংখিদবা মরম্না খঙবা ঙমখিদবনি হায়না ৱাইল্ড লাইফ ইন্সটিট্যুট ওফ ইন্দিয়াগী সাইন্টিষ্ট আর সুরেশকুমারনা ফোঙদোরক্লি।

মহাক্না ফোঙদোকখিবা মতূঙ ইন্না, রেদিও টেগ তৌরবা মতূঙদা মাইগ্ৰেটরি বার্দ মখল অসীনা শাংলবা লমশাঙদা কিলোমিটর ৬০০০  হেন্না শুংলেপ লেপ্তনা পাইরবা মতূঙদা রসিয়াদা থুংখিবগী থৌদোক অসী হন্দক চ্যুলুৱান- ২গী খোঙচৎ অসীনা অহানবনি। অতৈ অমুর ফাল্কোন অয়াম্বসু  অৱাং মায়কৈরোমদা পাইখ্রগা চাইনাগী অৱাংলোমদা পাইখিদুনা রসিয়াদা, চাইনাগী   অৱাংলোমদা লৈবা অঈংবা উমংগী শরুকশিং অমসুং সাইবেরিয়াগী লমদমশিংদা কালেনগী মতমশিদা মতম শাংনা লমথূঙফম ওইদুনা লৈরুরগনি হায়রি।

চৎলিবা চহী অসীগী নবেম্বর-দিসেম্বর থাদা মখোয় মনিপুর অমসুং নাগালেন্দগী উমংশিংদা চাক্তারগদৌরিবনি। মনিপুরদা পাইরকপা অমুর ফাল্কোন তরারোম সাইন্টিষ্ট শিংনা ঙসীফাওবদা সেট্টেলাইট টেগ তৌখ্রে। অহানবা ওইনা অমুর ফাল্কোন অমা হৌখিবা কুমশিং ২০১৮ গী নবেম্বর থাদা টেগ তৌরগা থাদোকখিবনি। মখোয় কদোমদা পাইরি, কদায়দা লমদন্দুনা লৈরি অমসুং কদায়না লমথূঙফম ওইরি হায়বা খঙননবা রেদিও টেগ তৌখিবনি।