পাকিষ্টানগী প্রাইম মিনিষ্টরনা টেরোরিজম, কাষ্মির ইস্যুগী মতাঙদা য়াশিন্নবা অমা পুরক্ন বা ৱারী শান্নরসি হায়রক্লবসু ইন্দিয়ানা য়াখিদ্রে

কাষ্মির ইস্যুগী মতাঙদা, ইন্দস ৱাটর ট্রিতি, ১৯৬০ অমসুং টেরোরিজমগী মতাঙদা মীফম অমা পাঙথোক্তুনা তুংকোইনা চৎনগদবা ৱারোয়শিন অমা পুরক্নবা হোৎনমিন্নসি হায়না পাকিষ্টানগী প্রাইম মিনিষ্টর সেহবাজ শরিফনা হৌদোরকখিবা প্রপোজেল অমা ইন্দিয়ানা অকনবা মওংদা রিজেক্ট তৌখ্রে। ইন্দস ৱাটর ট্রিটি, ১৯৬০ গী মখাদা লৈবাক অনীগী মরক্তা ঈশীং য়েন্নদুনা শীজিন্নদুনা লাকখিবদু হন্দক হৌখিবা এপ্রিল ২২ দা পাকিষ্টান্না শৌগৎপা টেরোরিষ্ট শিংনা জম্মু কাশ্মীরগী পাহলগাম এরিয়াদা টুরিষ্ট মীচম ২৬ নোংমৈনা কাপ্তুনা তমথীনা হাৎখিবা থৌদোক অদুগী মতূঙদা ইন্দিয়ানা সস্পেন্দ তৌখিবদগী পাকিষ্টান্দা ঈশীংগী অৱাবা চৈথেঙ মায়োক্নরগা লৈরকখিবনি।

কাষ্মিরগী ইস্যু হায়বা ৱাফম অমত্তা ইন্দিয়া-পাকিষ্টানগী মরক্তা লৈতে। কাষ্মির হায়বসি ইন্দিয়াগী ইন্টিগ্ৰেল পার্ট অমা ওইদুনা লাক্লি, মতূঙদসু ওইদুনা লৈগনি। পাকিষ্টানগী মতাঙদা ইন্দিয়াগী ফিরেপ্তি য়াম্না তশেং-তশেংই হায়না এক্সটর্নেল এফিয়র্স মিনিষ্ট্রিগী স্পোক্সপর্সন রন্ধির জয়শ্বালনা প্রেস ব্রিফিং অমদা ফোঙদোকখি।টেরোরিজম শৌগৎলিবা পাকিষ্টানগা ঈশীং য়েন্নদুনা চামিন-থকমীন্নবগী  ৱাফম অসী ইন্দিয়ানা ঙসীদি য়াম্না লাপ্না থমখ্রে। টেরোরিজমগা, টোল্ক হায়বসিগা পূন্না চৎমীন্নবা কৈদৌনুংদা য়াবা হৌনদে অদুগা ঈ খৌরাংলিবা পাকিষ্টান্না ঈশীং থকপগি অপাম্বা লৈফম থোক্তে। ঈ হায়বসিগা ঈশীংগা পূন্না চেন্থমিন্নবা কৈদৌনুংদা য়ারোই হায়না মমাঙদা প্রাইম মিনিষ্টর নরেন্দ্র মোদিনা ফোঙদোকখিবা ৱাফম অদূ জয়শ্বালনা নৌহৌননা মতাংসিদা নীংশিংখি।

পাকিষ্টান্না ওক্যুপাই তৌদুনা লৈরিবা পি ও কে খূদক্তা ভেকেট তৌগদবনি অদুগা চহী খরগী মমাঙদা ইন্দিয়ানা টেরোরিষ্ট শিংগী লিষ্ট অমা পীদুনা, ইন্দিয়াদা শিন্নরক্নবা খঙহনখিবদুগী মতূঙ ইন্না মখোয়শিং অদূ ইস্লামাবাদনা ন্যু দিল্লিদা খূৎশীন্নরক্লবদি দাইলোগ মখা চত্থননবা ৱাফম খন্নগনি। মদূ নত্রিমখৈ টেরোরিজম শৌগৎলিবা পাকিষ্টানগা কৈদৌনুংদা ৱারী শান্নররোয় হায়না জয়শ্বালনা ফোঙদোকখি।