ঈম্ফাল তুরেলগী মফম কয়াদা তোর্বান কায়বদগী মীয়াম খম থেংনা ঈচাওগী অৱাবা মায়োক্নরে

হৌখিবা চয়োল অমগী মমাঙদগী মনিপুরদা অকনবা নোং লেপ্পা লৈতনা অহীঙ-নুংথিল নাইদনা হৈথরকপদগী মনিপুরগী মরূওবা তুরেলশিংগী ঈশীঙগী ঈমায় খুদোংথীনিঙায় ওইবা থাক্তগী কা হেন্না ৱাংখৎলকপদগী তোর্বান কায়বা অমসুং ঈশীঙ পাথোরকপগী ফীভম মায়োক্নরগা লৈখ্রে।

ইম্ফাল ইষ্ট দিষ্ট্রিক্টকি খূরায় হৈক্রুমখোঙদা ঙরাঙ অয়ূক খঙহৌদনা ইম্ফাল তুরেলগী তোর্বান ফুট নিফূরোম শাংনা নীঙখায়রকপদগী হৈক্রুমখোঙ , খোমিদোক, খাবৈশোয়, খূরায় কোন্সম লৈকায়, হৈঙাঙখোংনচিংবা মফমশিংদা লৈরিবা য়ূম-কৈ, ইংখোলদা হৌবা মনা-মশীঙ, য়ূমদা য়োকপা য়ূমশা মখল পূম্নমক মাঙ-তাক্লে। য়ূম তরারোম অকনবা ঈশীঙগী ঈচেলনা চেন্থখ্রে অদূগা মশীং য়াম্লবা য়ূম কয়ামরূম্না ঈশীঙগী ঈরোন্নুংদা লৈখ্রে। মমা অমা, মচা অনীগা থারগা পূন্না মীওই অহূম তুরেলগী ঈশীঙনা কায়রকখিবা অদূদা চেন্থখিবদগী মীয়াম্না অশোয়- অঙাম য়াওদনা কলহৌবা ঙমখ্রে। কলহৌরবশিং অদুদি খূরায় হৈক্রুমখোঙদগী কোঞ্জেংবম সনানু (৪২), মপূরোইবা নোংয়াই, মখোয়গী মচা অনী লিংজেলথোইবি (৯) অমসুং মচানূপা ঙম্বা (৪) নি।

ইম্ফাল ইষ্ট দিষ্ট্রিকি অহল্লূপ হৈঙাঙ ময়ায় লৈকায়দসু ফুট ১০০ রোম শাংনা ইম্ফাল তুরেলগী তোর্বান কায়বদগী মায়কৈ অদোমদা পাক-সন্না ঈচাওগী অৱাবা মায়োক্নরগা লৈখ্রে। ন্যু চেক্কোন, কোনুং মমাঙ, অন্দ্রো পার্কিং, এ আই আর ষ্টুডিও কমপ্লেক্সনচিংবা মফমশিং ইম্ফাল তুরেলগী ঈশীঙ পাথোরকপদগী পাক- সন্না ঈশীঙ থূমজীনখ্রে। ঈথায় বেরেজগী গেট মরিমক হাংদোক্তুনা ঈশীঙ পন্থহন্দনা চেলহনবসু হৌখ্রে। চৈরকশিদা মনিপুরদা অহীঙ- নুংথিল নাইদনা হৌজিকসু অকনবা নোংজু মীয়াম্না মায়োক্নরগা লৈরি।