ইম্ফাল ইষ্ট দিষ্ট্রিক্টকি লম্লাই কেন্দ্রগী মনূঙ চন্না লৈরিবা থুম্বী চীঙ হায়না খঙনরিবা মফম অদূদা কা হেন্না ৱাংবদগী য়াম্না তোয়না লেন্দস্লাইদ থোকপদগী মীয়ামদা খুদোংচাদবা কয়া মায়োক্নহন্দুনা লৈরিবা অৱাংবা চীঙয়াঙগী শরুক্তাউ চীঙ নীঙখায়রিবা মফমদা এম এল এ খোংবান্তাবম ইবোমচানা চত্তুনা য়েংশিনখ্রে।
য়েংশিন- খোঙচৎ অদূদা খূরায় কেন্দ্রগী এম এল এ লৈশাংথেম সুশিন্দ্রোগী অপোকপা এল ইতোচা, নোংমাইচিঙ ফোরেষ্ট রেঞ্জ গী রেঞ্জ ওফিসার সোরোকখাইবম রোবার্টসন, পি দব্লিয়ু দিগী এগজিক্যুটিব ইঞ্জিনিয়র কোংখাম রোবিন্সন, এসিষ্টেন্ট ইঞ্জিনিয়র ৱাইখোম থেঙ্গরা, সেক্সন ওফিসার চুঙ্খাম ওন্দ্রিলা, ৱাটর রিছোর্স দিপার্টমেন্ট কি এগজিক্যুটিব ইঞ্জিনিয়র হাওবম রোসিকা, এ ই জোহন্সন, এস ও নোংদ্রেনখোম্বা, তখেল ভিল্লেজ দেভলপমেন্ট কম্মিটিগী প্রসিদেন্ট অমোম ভুবোন অমসুং কম্মিটি অসীগী মরুওইবা মেম্বর কয়ামরুমসু শরুক য়াখি।
চীঙ নীঙখায়রিবা মফম অদু শেমজীনবগী থবক পায়খৎলিবা ওফিসিয়েলশিং অমসুং শিন্মিশীংনা অকনবা মীৎয়েং চঙদুনা য়াম্না থুনা থবক অদু লোইশিন্ননবা এম এল এ ইবোমচানা পাউতাক পীখি।