চিফ মিনিষ্টর খেমচান্দ ঙসী হল্লক্লগনি হায়না পানরি, ঙরাং য়ুনিয়ন ফাইনান্স মিনিষ্টরগা উনখ্রে

মনিপুর লৈঙাক্কি অনৌবা মিনিষ্ট্রি এক্সপান্সন গী থবক খূমাঙ চাওশীলহন্ননবা সেন্টরগী লুচিংবশিংগা ৱারী শান্নরুনবা দিল্লিদা চৎখিবা চিফ মিনিষ্টর য়ূম্নাম খেমচান্দনা তোঙান তোঙানবা সেন্টরগী লুচিংবশিংগা ৱারী শানখ্রবা মতূঙদা ঙরাং অমুক মখাতানা য়ুনিয়ন ফাইনান্স মিনিষ্টর নির্মালা সিতারামন উনদুনা মনিপুরগী চাওখৎ-থৌরাংগী মতাঙদা ৱাফম কয়ামরুম খন্ন-নৈনখ্রে। ফাইনান্স মিনিষ্টরগা উনখিবা অদুদা মনিপুরগী দিপ্যুটি চিফ মিনিষ্টর অনী- নেমচা কিপগেন অমসুং লোসি দিখোসু শরূক য়াখি হায়রি।

চিফ মিনিষ্টর ঙসী ইম্ফালদা হল্লক্লগনি হায়রি।মহাক্কা লোয়ননা কুকি-জো কাঙলূপকি এম এল এ অনী ঙুরশাংলুর সনাতে অমসুং এল এম খৌটেসু লোয়নরক্কনি অদুগা বি জে পিগী নোর্থ ইষ্ট ইন-চার্জ সম্বিট পত্রা অমদি পার্টী অসীগী স্পোক্সপার্সননচিংবা লোয়নরক্কনি। সেন্টরগী লুচিংবশিং লোয়নরক্কদৌরিবশি মনিপুরগী পোপ্যুলর লৈঙাক অসীগী মিনিষ্ট্রি ঙসী ফাওবা এক্সপান্দ তৌদনা লৈরিবসি অথূবা মতমদা অনৌবা মিনিষ্টরশিং হাপচীন্দুনা চাউথোক্নবগী মতাংদা চঙশীল্লকপা খোঙথাং অমা ওইগনি হায়রি।

য়ূম্নাম খেমচান্দনা হৌখিবা ফেব্রুয়ারি মরিদা চিফ মিনিষ্টর ওইনা ৱাশক লৌখিবা মতমদুদা চুরাচান্দপুরগী এম এল এ ওইরিবা এল এম খৌটে অমসুং টিপাইমুখ কেন্দ্রগী এম এল এ ঙুরশাংলুর সনাতে সু শরুক য়াখিবনি। এম এল এ অনিমক হন্দক্কি অনৌবা মিনিষ্ট্রি এক্সপান্সন অসিদা ৱাশক লৌরগনি হায়না পানরি।মসীগীসু মথক্তা এন পি এফকি এম এল এ পূম্নমকসু মিনিষ্টর ওইনা ৱাশক লৌরবা য়াই হায়রি। হন্দক্কি খেমচান্দনা লুচিংবা মনিপুরগী পোপ্যুলর লৈঙাক অসীদা মনিপুরগী পুৱারিদা অহানবা অমা ওইনা নেমচা কিপগেননা নূপী দিপ্যুটি চিফ মিনিষ্টর ওইরিবনি।