লাক্লিবা একাদেমিক সেসন ২০২৬ কি ওইনা বোর্দ ওফ সেকেন্দরি ইদুকেসন মনিপুর (বোসেম) না পুথোক্কদবা ক্লাস ৱান্দগী টেন ফাওবগী লাইরিকশিং নম্ননবা অহানবা তাঙ্কক্কি ওইনা পুরকখিবা অফবা ক্বালিটিগী চে ট্রক লোদ অনী বোসেমগী চ্যেরমেনগী অয়াবা ফংদে হায়দুনা বোর্দ অসীগী সেক্রেটরিনা লৌশীল্লু য়ারক্ট্রে,মরম অদুনা থৌওং অসীগী মায়োক্তা মরী লৈনবা কোর্টতা ৱাকৎলগনি হায়না ঈবূধৌ মার্জিং পেইন্ট এন্দ এদভর্টাইজিংগী প্রোপ্রাইটর এল জাপান্না পাউমীশিংদা ফোঙদোকখ্রে। মহাক্না ফোঙদোরকপগী মতূঙ ইন্না,বোসেমগী মখাদা ক্লাস ৱান্দগী টেন ফাওবগী লাইরিকশিং নম্ননবা চে লৌনবগীদমক টেন্দর তৌরকখিবদা মহাক্কি কম্পেনি অসিদা টেন্দর ফাওরকখি।
অদূম ওইনমক টেন্দর থামিন্নখিবা কম্পেনি অমনা কোর্টতা কেস অমা ফাইল তৌরকখিবা মরম্না মদূগী চয়েৎনখিবা চৈরক্তা মতম খরা চে পুরকপগী থবক-থৌরমশিংদা খরা থেঙথহনখি।মমৈথঙদা হায় কোর্ট ওফ মনিপুরনা প্রোপ্রাইটর জাপান মশামক্কি ফেবরদা চে চিংলক্নবা জজমেন্ট পীবিরদুনা মপানগী ষ্টেটশিংদগী য়াম্না ৱানা,অহানবগী ওইনা চে ট্রক লোদ অনী চিংলকখিবনি।চে অসী বোসেম্না মহৈরোয়শিংগীদমমক লাইরিক নম্নবখক্তা নত্তনা মথঙ চহী ২০২৬ কি অঙনবা শরুক্তা পাঙথোক্কদৌরিবা ঐচ এস এল সি ইগজামিনেসনগী অন্সর স্ক্রিপ ওইনসু শীজীন্নগদবনি হায়না জাপান্না পাউমীশিংদা ফোঙদোকখি।
মহাক্না মখাতানা হায়, অহানবগী ওইনা চে ট্রক লোদ অনী অদূ ইম্ফাল-দিমাপুর লম্বীদা পুরকখি অদুবু লম্বী চৎপা য়াদবদগী অমুক কোইথোক্লগা ইম্ফাল -জীরী লম্বীরোমদা য়াম্না ৱানা হোৎনদুনা লাকখিবনি।ইম্ফাল য়ৌরক্লবা মতুংদা বোসেমগী সেক্রেটরিনা চে থাধবা য়াহল্লক্তবনি। লাইরিক নম্ননবা চে অসী মহৌশাগীদি ওক্তোবর থাদগী বোসেম্না নম্বা হৌবনি।হন্দককি ওইনা পূন্না লাইরিক নম্নবা অমদি এগজামগী অন্সর স্ক্রিপ ওইনসু শীজীন্ননবা চে ট্রক লোদ তরেৎ পুরক্কদবনি।অহানবা তাঙ্কক্কি ওইনা পুরকখিবা অফবা ক্বালিটিগী চে ট্রক লোদ অনী বোসেমগী চ্যেরমেনগী অয়াবা ফংদে হায়দুনা লৌশীনবিয়ু য়ারক্ট্রিবা অসীগী মতাঙদা মরী লৈনবা কোর্টতা ৱাকৎলগনি হায়না জাপান্না পেন্দবা ফোঙদোকখি।