ষ্টেট অসীদা বি জে পিগী লৈঙাক অমা হৌখিবা কুমশিং ২০১৭ তগী লাকখিবদগী লমদম অসিদা তৌহৈদবা ঙাক্তা তৌদুনা লৈরি। মসীনা মরম ওইরগা মীয়াম ৱাবনা খম থেংলে, মনিপুর অসী মথক-মখা ওন্থোরক্লি হায়না কংগ্রেসনা য়াম্না কন্না পেন্দবা অমসুং য়ানিংদবা ফোঙদোকখ্রে। মোইরাং কেন্দ্রদা লৈরিবা তোঙান-তোঙানবা রিলিফ কেম্পশিংদা চঙজফম লৌরিবা ইন্টরনেল্লি দিসপ্লেস পার্সন (আই দি পি) শিংদা ফংহনফম থোকপা চাকথূঙ অমদি রিলিফ মেটরিয়েলশিং মপূঙফানা ফংহল্লিব্রা, রিলিফ কেম্পশিং মওং-মরীল চুম্না চল্লাইরিব্রা হায়বসি অচৌবা ৱাহং অমা ওইরি হায়না এম পি সি সিগী চিফ স্পোক্সপর্সন হরেশ্বর গোশ্বামিনা ফোঙদোকখ্রে।
ইম্ফালগী বি টি রোদতা লৈবা কংগ্রেস ভাবন্দা পাউমীশিংগা উনবগী থৌরমদা মহাক্না ৱাফম অসী ফোঙদোকখিবনি। সেন্টর অমদি ষ্টেট লৈঙাকশিংনা লমদম অসীগী লাঞ্জেন্নরক্তুনা লৈরবা আই দি পিশিংগীদমক থাধরকপা শেনফমশিং মতৌ করম্না অমসুং কদায়ফাওবা নিয়ম চুম্না শীজীন্নরিবগে হায়বগী মতাঙদা আর টি আইগী খূত্থাঙদা হংলুবদা সেক্যুরিটিগী রিজন্না মরম ওইরগা পাউখুম পীদনা লৈরকখ্রবা মতূঙদা হৌজিক নৌনা পাউখুম পীরকপসি য়াম্না চিংননিঙায় ওইরে হায়খি।
আর টি আইগী পাউখুম অসীসু পেন্নিঙাই ওইদ্রি, হাবী-জাবী তৌরে হায়বগী খূদম ফংলি। রিলিফ কেম্পশিং অসী মিনিষ্ট্রি ওফ হোম এফ্যের্স, ষ্টেট কি হোম দিপার্টমেন্ট, লাইন দিপার্টমেন্টশিং অমদি মরী লৈনবা দিষ্ট্রিক্টশিংগী দিপ্যুটি কম্মিস্নারশিংনা খূৎশম্নরগা চল্লাইরিবনি। মরম অদুনা লৈঙাক্কি মেচিন্নরিশিংনা য়েনগদবা আই দি পিশিংগী মেটরিয়েলশিং মতৌ করম্না মোইরাংগী এম এল এ না ময়ূমদা য়েন্থোক্লিবনো হায়বসি হৌজিক লৈরিবা পি আর লৈঙাক্না অথূবা মতমদা থিগত্তুনা মরাল লৈবশিং অকনবা চৈরাক পীফম থোকই হায়না গোশ্বামিনা ফোঙদোকখি।