অনৌবা পোলিটিকেল পার্টি শেম্বা হায়বদুদি মঙদা মঙ্গরা তানবগুম্বনি, ওইথোক্লোই: খেমচান্দ

মনিপুরদা নোংথোম্বম বিরেন্না লুচিংবা বি জে পিগী লৈঙাক অমা লৈরম্বদগী চিফ মিনিষ্টর রিজাইন তৌখ্রবা মতূঙদা প্রসিদেন্ট রুল থমজিল্লকখিবা মরম্না লৈঙাক্কি মিনিষ্টর, এম এল এশিং হৌজিক্তি মথৌ মঙমশিং পাঙথোকপা ঙমহন্দ্রে, মখোয়দা লৈরম্বা পৱার পূম্নমক লৌথোক্লগা ষ্টেটকি গভর্নরনা পূল্লপ পায়শীনখ্রে। হান্না ষ্টেট লৈঙাক্কি ইদুকেসন মিনিষ্টর ওইরম্বা থৌনাউজম বসন্ট কুমারগী ওফিস ওইরম্বা ওল্ড সেক্রেটরিয়েত্তা লৈরিবা রুম অদুদা গভর্নরগী ওফিস শেমদোক্তুনা চয়োল অমদা নুমীৎ হুম্নি লৈঙাক-সাসনগী থবক থৌরমশিং পাঙথোক্ননবা থৌরাং তৌখ্রে।

চৈরকশিদা ঙরাং ইম্ফালগী নিত্যাইপাৎ চুথেক্তা লৈরিবা থম্বাল শঙলেন্দা বি জে পি মনিপুর প্রদেসকি প্রসিদেন্ট অধিকারিময়ূম সর্দানা বি জে পিগী এম এল এ অহুমগা উনদুনা হৌজিক ওইরক্লিবা মনিপুরগী রাজনিতিগী ফীভমশিংগী মতাংদা খন্নখিবগা লোয়ননা অনৌবা লৈঙাক শেমদুনা অনৌবা লুচিংবা খন্ননবগী ৱাফমশিং নৈনখ্রে হায়রি। মীফমদুদা শীঙজমৈ কেন্দ্রগী এম এল এ য়ূম্নাম খেমচান্দ, লংথবাল কেন্দ্রগী এম এল এ কারাম শ্যাম অমসুং লম্লাই কেন্দ্রগী এম এল এ খোংবান্তাবম ইবোমচা শরুক য়াখি।

মীফমদু য়াওনবা লাকখিবা এম এল এ খেমচান্দনা পাউমিশিংদা হায়খিবা মতূং ইন্না, মনিপুরদা থম্লিবা পি আর অসি অসূম মখা শাংথরক্লবদি বি জে পিগী এম এল এ শিংনা অনৌবা পার্টি অমা শেম্লকপা য়াই হায়না মীওই খরনা ঙাঙলিবদু মঙদা মঙ্গরা তানবগুম্বনি, ওইথোক্লোই হায়খি।এম এল এ শিংগী মরক্তা মোৎ মান্নদবা লৈতে, তোঙান তোঙান্না কেম্প তৌনবসু লৈতে, অথূবদা অনৌবা লৈঙাক শেম্ননবা হোৎনরি হায়না পাউমীশিংগা উনখিবা থৌরম অমদা খেমচান্দনা মখাতানা ফোঙদোকখি।