পুন্সিদা মায় পাক্কে হায়বা তারবদি শূবা-নোম্বা কনবা, পূকচেল শেংবা, মিনুংশি খঙবা মথৌ তাই হায়না চিফ মিনিষ্টর য়ূম্নাম খেমচান্দনা ফোঙদোকখ্রে।
ঙরাং ইম্ফালগী পেলেস কম্পাউন্দ দা লৈবা সিটি কনভেন্সন সেন্তর দা পাঙথোকখিবা য়ুনাক্কো গ্ৰূপকি সিলভর জুবিলি থৌরমদা চিফ মিনিষ্টরনা অথোয়বা মীথূঙলেন ওইনা শরূক য়ারদুনা ৱা ঙাঙবদা ফোঙদোকখিবনি। য়ুনাক্কোগী চ্যেরমেন অমসুং মেনেজিং দিরেক্তর ওইনা লৈরিবা নিঙোম্বম ইরাবন্তগী অপোকপা, লৈখিদ্রবা নিঙোম্বম থোইবগী মিংদা হাংগদবা নিঙোম্বম থোইবা মেমোরিয়েল হোল গী ফাউন্দেসন ষ্টোনগী মায়খূমসু চিফ মিনিষ্টরনা হাংদোকখি।
মাইক্রো ফাইনান্স হায়বা থবক অসী শেন্দোংখক্কি ৱাফম নত্তে। নোংমগী চরা তাল্লিবা মীয়ামদা অপীকপা শেন্দোয় খরা লৌরগা শেল থাধদুনা মীয়ামগী হিংনবগী মতেং পাংলিবনি। খুদোংচাদ্রবশিং মশক খঙদোক্তুনা, শেন্দোয়দি লায়রদনা শেল্লেপ ফাওবা কোকথোকপিরিবনি হায়না চিফ মিনিষ্টরনা ফোঙদোকখি।
কুমজা ২০০০ দা য়ুনাক্কো লিংখত্তুনা ট্রান্সপোর্ট কা মরী লৈনবা হীরমদা অহানবা ওইনা থবক তৌবা হৌরকপদগী ঙসীগী থাক অসীদা তপ্না তপ্না য়ৌরকপা ঙমখিবনি। হৌজিক্তি গ্ৰূপ অসীনা মীওই লীশীং খরদি শেন্থোক লৈবা থবক পীবা ঙম্লে হায়না, থৌরমদুদা ৱা ঙাঙবদা য়ুনাক্কোগী লূচীঙপুরেল ইরাবন্তনা ফোঙদোকখি।
