কূমসী চহীগী ওইনা চৎলিবা নবেম্বর থা অসীগী ১১ দা পাঙথোক্কদৌরিবা মনিপুরগী খ্বাইদগী চাউরবা, নিঙোল চাক্কৌবা হায়না খঙনরিবা অসিদা ঐখোয়না ঈরমদমগী পোৎ-চৈ খক্তা শীজীন্নরসি, ঐখোয়গী পোত্থোক শীজীন্নদুনা দখিনা পীসি। দখিনা পীবদা ঐখোয় মশেল হিদান্নদুনা লমদমসিগী শেল-থুমগী ফীভম হেন্না শোকচীন্ননবা মখা তানা হোৎনরগুমসি হায়না ঈনাৎ য়োকখৎপা লূপতিন (ইয়োল ) মনিপুরগী সেক্রেটরি এম জয় না ফোঙদোকখ্রে।
নিপকোগী ইম্ফাল দা লৈবা ওফিসতা পাঙথোকখিবা পাউমীশিংগা উনখিবা থৌরম অমদা জয়না ৱাফম অসী ফোঙদোকখিবনি। কংলৈ খুনাই অসী মতম শাংনা খুদোংচাদবা অমসুং অৱা-অনা কয়া মায়োক্নদুনা লাক্লি। মীওই লীশীং কয়া ময়ূমদা হঞ্জিনবা ঙমদনা, রিলিফ কেম্পশিংদা চঙজফম লৌদুনা লৈরিবা চৈরকশিদা মীহাৎ-মীপূনগী থৌদোকশিং মায়োক্নরগা লৈরি। শুফম-নোম্ফম লৈতবদগী নহারোল কয়া ককঙাওনদুনা লৈরি।
শেল-থুমগী ফীভম নোংমা নোংমগী শোকচীনবসু হেল্লক্লি হায়বা ৱাফম মহাক্না থমখি। অসীগুম্বা তাঞ্জাসিদা ঐখোয়না চাক্কৌবদা দখিনাগী মতাঙদা ইনাক খুনবা, শেল পায়বা হিদান্নদুনা লৈগদবা মতম ওইদে হায়বা ৱাফম জয় না ফোঙদোকখি।