মনিপুরদা হৌজিক ফাওদা য়াম্না কন্না কাঙলূপশিংগী মরক্তা থোক্লিবা হীঙসা অসী অফবা খূদম নত্তে, নাগাশিংনা হীঙশা পামদে, নুংশি-চান্ননা, অমত্তা ওইনা হিংমিন্নবা পাম্মি। অদূম ওইনমক, কুকি মিলিটেন্টশিংগী চীরোলদা থাজরবা কুকি মীয়াম্না ওইদা-পাদবা, মীনম্বা থবক অমসুং ৱাঙাং শীজীন্নদুনা মালেমগী কম্যুনিটিশিংদা, মখোয়বু লমদমসিদা তুহৎপিরে হায়না উহন্ননবা হোৎনরি হায়না নাগাশিংনা পেন্দবা ফোঙদোরক্লি।
কুকি কাঙলূপনা মখোয়বু কনা লৈজদ্রবা ফূরূপ অমা ওইনা উহন্নবা ভিক্তিম কার্দশিং নীজীন্নরি। কুকি মিলিটেন্টশিংনা নাগা অমসুং মৈতৈ মীচমশিং পাক্তক্ননা হাৎপগী মথক্তা মীচম মীয়ামগী য়ূম লীশীং কয়া মৈ থাদোকখ্রবা মতূঙদা মখোয়বু মৈতৈ, নাগাশিংনা ওৎপী নৈবিরে হায়দুনা ওন্ন-তৈনবা খোল্লাউশিং লাউদুনা অচৌবা নমথাক তৌরি, মালেমগী মীয়াম্বু লান্না লমজীংনবা হোৎনরি হায়না য়ূনাইটেদ নাগা কাউন্সিল (য়ু এন সী) না কুকিশিংগী থৌওংবু য়াম্না কন্না য়ানীংদবা ফোঙদোক্তুনা চৈরক্লি।
কুকিশিংনা দিপ্যুটি চিফ মিনিষ্টর লোশি দিখোবু ফম থাদোক্কদবনি হায়রিবসি মীহাৎপা কুকি মিলিটেন্টশিং য়োকখত্তুনা থম্লিবী নেমচা কিপগেন দিপুটি চিফ মিনিষ্টরগী ফম থাদোক্কদবনি হায়না নাগা লেজিসলেটরশিংনা অচুম্বা দিমান্দ তৌরুবদা পাউখুম পীনিঙায় লৈরক্তবদগীনি হায়রক্লি ।
