ঙসী কোর্দিনেটিং কম্মিটি ওন মনিপুর ইন্টিগ্ৰিটি (কোকোমি) না শীন্দুনা ইম্ফালগী ক্বাককৈথেলদা লৈরিবা টিদ্দিম গ্ৰাউন্দ দগী থাংমৈবন্দ দা লৈরিবা থাউ গ্ৰাউন্দ ফাওবা চৎকদৌরিবা, মীয়ামগী অপূনবা দিমান্দ ফংনবগীদমক তকশীনবগী খোঙচৎ অসীদা মীয়াম্না কাঙলূপ -ফূরূপকি ৱাখল পূম্নমক অমসুং ঈশাগী অচীনবা কয়া তুংওইনরগা মনিপুর মীয়ামগী তুংগী য়াইফনবনি খনবিদুনা রেল্লি অসিদা শরুক য়াবিয়ু হায়না কোকোমি গী মায়কৈদগী মখা তানা আপিল তৌরকখ্রে।
ঙরাং ইম্ফালগী লম্ফেলদা লৈবা কম্মিটি অসিগী ওফিসতা পাঙথোকপা প্রেস কনফারেন্স অমদা কোকোমি ৱিমেন্স ৱিংগী কনভিনর লুৱাংলৈমানা মনিপুরগী মীয়ামদা আপিল অসী তৌরকখিবনি। ইন্দিয়া লৈঙাক্না মনিপুরদা চত্থরক্লিবা প্রোক্সি ৱার খূদক্তা লেপ্পু, মনিপুরদগী আসাম রাইফল্স লৌথোকখো, আর্ম ফোর্সেস স্পিসিয়েল পৱার এক্ত লৌথোকউ, কুকি মিলিটেন্টশিংগা লৈঙাক্কা সাইন তৌনখিবা সস্পেন্সন ওফ ওপরেসন্স (সূ) খূদক্তা হন্দোকউ, আই দি পিশিং মশাগী মহৌশাগী লৈফমশিংদা অমুক হন্না খুন্দা-লৈতাহল্লু হায়বা দিমান্দশিং তকশীন্দুনা মীয়ামগী অচৌবা খোঙচৎ অসি চৎকদবনি হায়না লূৱাংলৈমনা ফোঙদোকখি।
কোকোমিনা শীন্দুনা পাঙথোক্কদৌরিবা মীয়ামগী খোঙচৎ অসিবু শৌগত্তুনা নাগা মীয়াম্নসু অচৌবা সোলিদারিটি মার্চ কয়ামরূম চৎথনবা থৌরাং তৌখ্রবনি। খোঙচৎ অসী লৈবনা মরম ওইদুনা মনিপুর তম্পাক অমসুং নাগা তাবা চীঙগী মফমশিংদা মীয়াম্না শিন্থা লেপ্নখিবনা দুকান, কৈথেল হাংনদ্রে। লম্বীদা গারিশিং চৎনদ্রে।