জাতিগী মপা মহাত্মা গান্ধীগী মপোক কুমওন থৌরম ঙরাং লৈবাক অসীগী মফমশিং শীন্থুংনা পাঙথোকখিবগী শরূক অমা ওইনা মনিপুরদসু ষ্টেট লৈঙাক্না শীন্দুনা ইম্ফালগী গান্ধী মেমোরিয়েল হোলদা বাপুজিগী মপোক কুমওন থৌরম পাঙথোকখিবগা লোয়ননা জাতিগী মপা অসীগী মিতমদা মীয়াম্না লৈ-শু কত্তুনা ঈকায় খুম্নখ্রে।
নেস্নেল ক্লিনলিনেস ডে হায়না খঙনরিবা থৌরম অদুদা লূ-নান্না লৈননবা, অকোয়বগী শক্তম কন্ননবা চাং নাইনা শীত্তোক-শেংদোকপগী তঙায় ফদবা লৈ হায়না মনিপুরগী গভর্নর অজয় কুমার ভাল্লানা ফোঙদোকখ্রে। অচূম্বা, নন-ভাইওলেন্স অমসুং লৈবাক্কিদমক খনবা হায়বা গান্ধীজিগী ৱাখল্লোন অদুনা লমজীং ওইদুনা লূ-নানবা মনিপুর অমা ওইহল্লসি হায়না গভর্নরনা মীয়ামদা ফোঙদোকখি।
থৌরমদুদা ৱা ঙাঙবদা চিফ মিনিষ্টর য়ূম্নাম খেমচান্দনা হায়, মহাত্মা গান্ধীনা লৈবাক অসীদা দেমোক্রেসিগী ঈহৌ শাগৎপদা লৌখিবা থৌদাং অদূ নীংশিংদুনা ঙসী ফাওবা জাতিগী মপা অমা ওইনা মীয়াম্না নুংশিনা শোন্নরিবনি। ঐখোয়গী পূক্নীং-ৱাখল অসি অচূম্বদা য়ূম্ফম ওইদুনা লৈবাক্কি অমসুং খুন্নাই অসীগী মীয়ামগী য়াইফনবগী হীরমদা ঈশানা অঙম্বা থাক্তা থবক তৌনরবদি লূ-নানবা, চাওখৎপা লমদম অমা ওইবা ঙমগনি হায়খি। গান্ধীজীনা পামজরম্বা নুংশিনবা, অচূম্বা চৎপা, হীঙশা থাদোকপা, ঙাকপীবা হায়বা গুন অসীগা লোয়নদুনা থবক পায়খৎলবদি শান্তি লৈবা, চাওখৎপা লমদম অমা ওইগনি হায়না চিফ মিনিষ্টরনা ফোঙদোকখি।