মনিপুরগী মিরাবাই চনূ, রোশিবিনা অনীমক্না এসিয়ান গেম্স তা সিলভর লৌবা ঙমখ্রে

হৌজিক জাপানগী আইচি-নাগোয়াদা চত্থরিবা ২০ শুবা এসিয়ান গেম্স অসিদা ইন্দিয়ান কন্তিঞ্জেন্ট তা য়াওরিবা মনিপুরগী শান্নরোয়শিংগী মরক্তগী হৌজিক ফাওবদা কুমারি মিরাবাই চনুনা ৱেথলিফটিংদা, নূপীগী কেজি ৪৯ গী কেটাগোরিদা সিলভর মেদল লৌদুনা ইন্দিয়াগী অচৌবা মিংচৎ অমা হাপকৎপা ঙমখ্রে। নাউরেম রোশিবিনা সু ৱূশু মশান্নদা সিলভর মেদল লৌবা ঙমখ্রে।
মশাগী চহী ৩২ শুরবী ৱেথলিফ্টর মিরাবাই চনুনা স্নেটচতা কেজি ৮৭ অমসুং ক্লীন এন্দ জর্কতা কেজি ১১১, পূন্না কেজি ১৯৮ থাঙ্গত্তুনা সিলভর মেদল লৌবা ঙমখিবনি। কুমশিং ১৯৯৮ দা পাঙথোকখিবা বেঙ্কোক এসিয়ান গেম্স তা ইন্দিয়াগী করনাম মালেশ্বরিনা ৱেথলিফ্টীংদা সিলভর মেদল ফংখিবা অদূগী মতূংদা ঙরাং মিরাবাইনা ফংখিবা অসীনা ইন্দিয়াগী অহানবা ওইরি। অনীরক হন্না ৱেথলিফ্টীংদা এসিয়ান গেম্স কি ৱিন্নর ওইখ্রবা ৱার্ল্ড চেম্পিয়ন রি সোং গুম (নোর্থ কোরিয়া) না স্নেটচ তা কেজি ৯৪ অমদি ক্লীন এন্দ জর্কতা কেজি ১২১, পূন্না কেজি ২১৫ থাঙ্গত্তুনা গোল্ড মেদল লৌখি। ইন্দোনেসিয়াগী বিজয়ানা লুলূপ দাইনিত্রি না স্নেটচ তা কেজি ৮৮, ক্লীন এন্দ জর্কতা কেজি ১০৩, পূন্না কেজি ১৯১ থাঙ্গত্তুনা ব্রোঞ্জ মেদল লৌখি।
নাকল অমরোমদা, মনিপুর পুলিস দিপার্টমেন্টদা দি এস পি (স্পোর্টস) ওইনসু লৈরিবি নাউরেম রোসিবিনাসু ঙসী অঙনবা অয়ূক্তা লোইশিনখিবা কেজি ৬০ গী ৱিমেন্স সান্দা ৱূশু ইভেন্ত তা সিলভর মেদল ফংখ্রে। চাইনাগী ঝাং জিয়াউয়ু না মহাকপু ০-২ দা থোইদুনা গোল্ড লৌখিবনি। রোশিবিনানা ফংখিবা সিলভর অসীগা লোয়ননা হৌজিক ফাওবদা লৈরিবা ইন্দিয়াগী মেদল টেল্লি অসী অসী ১৪ দা কাপখৎখ্রে। গোল্ড ১, সিলভর ৬ অমসুং ব্রোঞ্জ মেদল ৭ নি।