ইম্ফালদা লৈরিবা ধনমঞ্জুরি য়ুনিভর্সিটি (দি এম য়ু) দা নোন-জে আর এফ রিছার্স স্কোলার ওইনা লৈরিবা মহৈরোয়শিংগী মতম শাংনা পীথোক্তনা, নমশীন্দুনা লৈরক্লিবা ফেল্লোসিপকি ষ্টাইপেন্দ খূদক্তা পীথোক্নবা এসেমব্লিদা পুথোক্তুনা খন্নবিয়ু হায়বা দাবী তকশীন্দুনা ঙরাং য়ুনিভর্সিটি অসীগী স্কোলারশিংনা দি এম কোল্লেজগী মনাক্তা লৈরিবা লম্বীগী নাকন্দা অচৌবা সিট -ইন-প্রোটেষ্ট অমা চত্থখ্রে।
ধনমঞ্জুরি য়ুনিভর্সিটি ষ্টুদেন্টস য়ুনিয়নগী প্রসিদেন্ট ওইনা লৈরিবা ইরোম দিমোচানা ফোঙদোরকপা মতূঙ ইন্না, হৌখিবা কুমশিং ২০২২, ২০২৪ অমসুং ২০২৬ তা লৌখিবা নোন-জে আর এফ রিছার্স স্কোলার ৮০০ গী ফেল্লোসিপ ষ্টাইপেন্দ অমত্তা ঙসী ফাওবা পীথোক্তনা, লৈঙাক অসীনা নমশীন্দুনা থম্বিরি। মসীনা মরম ওইদুনা রিছার্সকি থবক-থৌরমশিং মখাতানা চঙশীনবদা য়াম্না চাউনা খুদোংচাদবা মায়োক্নরি হায়না ফোঙদোকখি।
হন্দক নুমীৎ খরনিগী মমাঙদসু রিছার্স স্কোলারশিং অসীনা রেল্লি অমগা লোয়ননা প্রোটেষ্ট তৌবগী খোঙচৎ অমা চঙশীন্দুনা চিফ মিনিষ্টর য়ূম্নাম খেমচান্দ গা উনখি অমসুং লৈরিবা ইস্যু অসিগী মতাঙদা খন্নরবা মতূঙদা ষ্টাইপেন্দ খূদীংমক পীথোক্কনি হায়বগী থাজবা পীরকখি অদুবু হৌজিক ফাওবদা থবক ওইনা পাঙথোক্তনা লৈরি। মসী য়াম্না ফজদবা, চুমদবা অমনি হায়না মহাক্না পেন্দবা ফোঙদোকখি।
ঙরাংগী প্রোটেষ্ট অদুদা ৱাকৎলোয়শিং অদুনা “নো ষ্টাইপেন্দ, নো রিছার্স; এভরি দিস্কোভরি নিদ্স সপ্পোর্ট; ফন্দ অৱার রিছার্স, রেস্পেক্ট অৱার ৱার্ক; দিলেদ ষ্টাইপেন্দ, দিলেদ রিছার্স” হায়না ইবা প্লেকার্দশিংগা লোয়ননা মখোয়গী খোঙজঙ অদূ চঙশীনখি।
