মীয়াম্না মতৌ করম্না খোঙজঙ চঙশীনগদগে হায়বদু লৈঙাক অসীনা লাউথোকপিরো: ঈমাগী মৈরা

ইস্যু কয়ানা পীক থল্লিবা ষ্টেট অসীদা হৌজিক য়াম্না হেন্না মরূ ওইরিবা ইস্যু অসী এন আর সি অপদেট তৌবা হায়বসিনি। লৈলোন ৱাইফৈ এরিয়াদগী কুকি মিলিটেন্টশিংনা ফাখ্রগা য়াম্না কা হেন্না তমথিবা মওংদা হাৎপিখ্রবা নাগা মীচম ৬কি ৱাফমসু লৈরি।ইস্যুশিং অসী ৮শুবা এসেমব্লি সেসন্দা পুখত্তুনা খন্নগদবনি, মীয়ামদা জষ্টিস ফংহনগদবনি অদুগা এন আর সিগী বেজ ইয়রসু ১৯৫১ ওইগদবনি হায়বগী ৱারেপ এসেমব্লিনা পাস তৌগদবনি হায়বগী দাবী তৌদুনা খোয়াথোংদা অহীং য়ারেক্তুনা ৱাকৎ মীফম চত্থদুনা লৈরক্লিবা ঈমাগী মৈরা লূপকি নূপীশিংদা কম্মান্দোগী কাঙবূ অমনা অহীঙ পূং ১ রোম তাবা মতমদা লাক্লগা অথীবা ৱাহৈ শীজীন্নদুনা ৱাকৎ মীফম থুগাইরম্বগী থৌওং য়ানিংদে হায়না ঈমাগী মৈরাগী কনভেনর টি ঐচ সুজাতানা ফোঙদোকখ্রে।

নূপী পুলিস য়াওদনা নূপা কম্মান্দোগী কাঙবূ অদূনা মৈরা পায়বীশিং অদূদা, “অহীং থেঙলে নয়ূমদা থিনবিরম্লগে ৱাকৎ মীফম লোইশিল্লো, লোকঅপ্তা চল্লরোই, হোতেলদা ওইনা লৈরো ” হায়দুনা করেম্নবা ৱাহৈ কয়া ফোঙদোক্লম্মি হায়না সুজাতানা কন্দেম তৌখি।রেল্লি চৎপা, ৱাকৎ মীফম চত্থবা অমত্তা য়াররোই হায়রবনিনা লৈঙাক অসিনা পাম্লিবা মীয়ামগী খোঙজঙ অসী করম্বনো, লাউথোকপিরো হায়না সুজাতানা লৈঙাক্তা হংলক্লি।

দিপ্যুটি চিফ মিনিষ্টর নেমচা কিপগেন্না এসেমব্লি সেসন হৌখিবা নুমীৎ, সেপ্তেম্বর ২ দগী ভর্চুএল ওইনা শরুক য়ারদুনা লাকখিবা মতমদুদা রিএক্সন অমত্তা ঊৎখিদবা এম এল এ অৱাংবৌ ন্যুমাইনা প্রেস মিট পাঙথোক্তুনা, নেমচা কিপগেন য়াওরিবা এসেমব্লি সেসন্দা য়াওরোই, নাগা এম এল এশিংনা হাওস বোইকোৎ তৌরে হায়জীন্দুনা নাগা ৬ হাৎখিবগী মতাঙদা জষ্টিস পীননবা ৱারেপ অমত্তা লৌহনখিদবা, এন আর সিগী বেজ ইয়র ১৯৫১ ওইহনগদবনি হায়বগী ৱারেপ তাবা ঙমহনখিদবসি য়াম্না লাইবক থীবনি হায়না মখাতানা সুজাতানা পেন্দবা ফোঙদোকখি।