নাগা-কুকিগী ঈরাং লেপহন্নবা অখন্নবা থৌশিল পায়খৎনবা ঐচ আর দব্লিয়ুনা খঙহল্লকখ্রে

চহী অসীগী হৌখিবা ফেব্রুয়ারি থাগী অঙনবা শরূক্তগী হৌজিকফাওবা নোংমা নোংমগী ফীভম ফৎচীল্লক্তবগা লোয়ননা নাগা-কুকি অনীগী মরক্তা হাৎনা-শুনবগী থোদোকশিং হেঙ্গৎলক্লিবা অসী য়াম্না নুংনাংনিঙায় ওইবা থাক অমদা চঙশীল্লক্লি। মসী থেঙলবসু থেঙনা হৌজিকমক অকনবা মীৎয়েং চঙদুনা ইন্দিয়া লৈঙাক্না ভাইওলেন্স অসী লেপহন্ননবা অখন্নবা থৌশিল-থৌরাং লৌখৎকদবনি হায়না হ্যুমেন রাইট্স ৱাট্চ (ঐচ আর দব্লিয়ু) না অকনবা ৱাফম ফোঙদোরকখ্রে।

হৌখিবা কুমশিং ২০২৩ গী মে অহুমদগী হৌরকখিবা মৈতৈ-কুকি অনীগী ঈরাং লোইশিনবা য়াননবা সেন্টর অমদি ষ্টেট লৈঙাক্না থৌরাংশিং নীঙথিনা লৌখত্তবনা ষ্টেট অসীদা কাঙলূপশিংগী মরক্তা য়েংথীনরকপগী চাং য়াম্না ৱাংনা লৈরিঙৈ চৈরক্তা নাগা অমসুং কুকি কাঙলূপ অনীগী মরক্তা থোক্লিবা হীঙশাগী ঈরাঙ অসীনা অমূক হেন্না ফীভম শোকচীল্লকপগুম তৌরে। ষ্টেট লৈঙাক্কি মায়কৈদগীসু ঙসীফাওবা তুং কোইনা চৎনবা য়াগদবা থৌশিল লৌখত্তুনা হীঙশাগী ঈরাঙ অসী নমথনবা হোৎনবা উদ্রি হায়রি।

হৌখিবা ফেব্রুয়ারি থাদগী থোক্লক্লিবা নাগা-কুকিগী হাৎনা-শুনবগী ঈরাং অসীদা মীওই কয়াগী পুন্সি লোমখ্রে হায়না ঐচ আর দব্লিয়ুগী এসিয়া দিরেক্টর ইল্লে প্যাসন্না নুংনাংবা ফোঙদোকখি। মনিপুরদা ঈরাং অসী লাকশীনগনি হায়না নৌনা মীয়ামগী লৈঙাক অমা হৌখিবা ফেব্রুয়ারি থাদগী লৈরকখ্রবসু ঈরাং অসীদি লাকশীনবা ঙমদ্রে। চহী অসীগী মে ১৩ দা কুকি মিলিটেন্টশিংনি চিংনবশিংনা ফাজীনখিবা নাগা মীচম ৬, তমথিবা মওংদা মকক-মকক কক্লগা হাৎখ্রে।ফীভম অসী হেন্না লুশিল্লক্ট্রিঙৈদা সেন্তর অমসুং ষ্টেট লৈঙাক্না ঈরাঙশিং অসী য়াম্না অথূবা মতমদা লাকশীনফম থোকপনি হায়বা ৱাফম প্যাসন্না ফোঙদোরক্লি।