লৈলোন ৱাইফৈ মীহাত্তা চেন্নবনি হায়বা মীওই ৪ গী মথক্তা এন আই এনা ইনভেষ্টিগেসন চত্থরি: গোবিন্দাস

চহী অসীগী মে ১৩ দা লৈলোন ৱাইফৈ ভিল্লেজ মনাক্তা কুকি মিলিটেন্টশিংনি চিংনবশিংনা ফারবা মতূঙদা মকক মকক কক্লগা তমথীনা মীওৎ-মীনৈ চত্থদুনা হাৎখিবা কোন্সাখুলগী নাগা মীচম তরূক অদূগী মতাঙদা জষ্টিস ফংননবা মনিপুর লৈঙাক্না য়াম্না কন্না তকশীন্দুনা থবক পায়খৎলি। মীহাৎপগী থোদোক অদুদা চেন্নবনি হায়বা মীওগ ৪ নেস্নেল ইনভেষ্টিগেসন এজেন্সি (এন আই এ) না ফাগৎপা ঙমখ্রে। মখোয়গী মথক্তা অকনবা ইনভেষ্টিগেসন চত্থরি হায়না মনিপুর লৈঙাক্কি হোম মিনিষ্টর গোবিন্দাস কোন্থৌজম্না ফোঙদোকখ্রে। চৎলিবা সেপ্তেম্বর থা অসীগী অনীদগী চত্থবা হৌখিবা ১২ শুবা মনিপুর লেজিসলেটিব এসেমব্লিগী ৮ শুবা সেসনগী ঙরাং নীনী চনবা নুমিত্তা ৱাহং-পাউখুমগী মতমদা কংগ্ৰেসকি এম এল এ থোকচোম লোকেশ্বর অমদি কাঙুজম রঞ্জিৎনা পুখৎলকখিবা ৱাহংশিংগী পাউখুম পীরদুনা ৱাফম অসী গোবিন্দাসনখ ফোঙদোকখিবনি।

মহাক্না হায়, নেস্নেল হায়ৱেশিং , ইম্ফাল-দিমাপুর লম্বী অমসুং ইম্ফাল-জিরিবাম লম্বীদা কনাগুম্বা মীওই নত্রগা লূপ অমত্তনা মখল অমত্তগী অথীংবা পীরকপগী থৌওং অমত্তা হৌজিক ফাওবদা লৈত্রি।  মনিপুর মীয়ামগী লাইফ-লাইন ওইরিবা লম্বীশিং অসীদা অয়েৎ-অপন অমত্তা পীরকপা ঙমহন্দনবা অনৌবা এক্ট অমা চৎনবা হৌরে। মসীগী মতূঙ ইন্না অপনবা, অথীংবা পীরকপশিংগী মথক্তা মতীকচাবা এক্সন লৌখৎনবা অকনবা থবক পায়খৎলি। মৈতৈ অমসুং নাগা কাঙলূপকি মীওইশিং য়াওনা মীয়াম্না লম্বীশিং অসিদা চত্থোক-চৎশিন তৌরি। সেক্যুরিটিগী অকনবা চেকশীন-থৌরাংসু লৌখৎলি হায়খি।

কে এন এফ -পিগী চ্যেরমেন ওইরিবা, অদুগা, দিপ্যুটি চিফ মিনিষ্টর নেমচা কিপগেনগীনা মপুরোইবনি হায়রিবা মীওই অদূ লৈলোন ৱাইফৈগী মীহাৎ অদুদা চেন্নৈ হায়বগী লীখূন অমত্তা হৌজিকফাওবগী ওইনা ফংবা ঙমদ্রি হায়না এন আই এনা মনিপুর লৈঙাক্কী হোম দিপার্টমেন্টতা খঙহল্লকপা লৈরে হায়বা ৱাফম গোবিন্দাসনা হাওসতা থমখি।