ঙরাং আগষ্ট ১৭ তগী হৌখ্রবা মীকোক থীবগী সেল্ফ ইন্যুমরেসন অমসুং সেপ্তেম্বর অমদগী হৌগদৌরিবা হাওস লিষ্টিং অসীগী মায়োক্তা নন-কোওপরেসন মূভমেন্টগী শরূক অমা ওইনা, খ্বাইরম্বন্দ ইমা কৈথেলগী লূপশিংনা শীন্দুনা অচৌবা প্রোটেষ্ট অমা পাঙথোকখ্রে।
মীকোক মশীং থীদ্রিঙৈ মমাংদা এন আর সি হান্না অপদেট তৌগদবনি, এন আর সি তৌদনা মীকোক থীবা কৈদৌনুংদা য়াখিরোই, আই দি পিশিংগী চপচাবা মফম খঙহন্দ্রিফাওবা মীকোক থীবা য়ারোই হায়না খ্বাইরম্বন্দ কৈথেলদা পোৎফম ফম্বী ঈমাশিংনা অকনবা প্রোটেষ্ট চত্থখিবনি। লৈঙাক্না চত্থরক্লিবা সেন্সসকি থবক থৌরমশিংদা মীয়াম্না কোওপরেসন পীবীগনু, লৈঙাক্কি শিন্মীশিং মীকোক থীবগী থবক্তা য়াওশীল্লকপা তারবদি ঈশানা ঈশাগী খোঙদা শীংজনা য়ান্সীঞ্জবা ওইনা থোক্কনি, শরূক য়াবিগনু হায়না জে এফ দিগী জেনরেল সেক্রেটরি ওর্গানাইজেসন লোংজম রতন্না ফোঙদোকখ্রে।
প্রোটেষ্ট অদুদা শরুক য়াখিবা রত্তন্না মখা তানা হায়, জে এফ দিনা মীয়ামগা লোয়ননা চঙশীল্লিবা খোঙজঙ অসী লৈবাক অসিগী লো না সপ্পোর্ত তৌরিবা অমনি। হৌজিক লৈবাক অসিদা চৎনরিবা ফোরেনর্স এক্ট ১৯৪৬, সিটিজন্সিপ এক্ট ১৯৫৫ অমদি ২০০৩ অমদি অতৈ এক্ট পূম্নমক্না শৌগৎলিবা খোঙজঙ অমনি হায়খি।