শেমদোক্লবা সূ এগ্ৰিমেন্ট খূৎয়েক পীনখ্রে

মীয়াম্না কুকি-জো কাঙলূপকী ইন্সর্জেন্টশিংগা লৈঙাক্কা খূৎয়েক পীনদুনা হৌজিক চৎনরিবা সস্পেন্সন ওফ ওপরেসন্স (সূ) অসীগী মরুমদা কুকি-জো মিলিটেন্টশিংনা খূৎলায় পায়দুনা হাৎনীংবা মতমদা মীচম কয়া পাক্তক্ননা হাৎলক্লিবা অসীগী মায়োক্তা খোল্লাউ কয়ামরুম লাউরক্তুনা কুকি-জো মিলিটেন্টশিংগা তৌনরিবা সূ এগ্ৰিমেন্ট অসী খূদক্তা এব্রোগেট তৌগদবনি, হন্দোক্কদবনি, কুকি-জো মিলিটেন্টশিং তকথোক্কদবনি হায়বা অকনবা খোঙজঙ চঙশীল্লিঙৈ চৈরক্তা সেন্তর, মনিপুর লৈঙাক অমসুং কুকি-জো ইন্সর্জেন্ট, মায়কৈ অহূমগী মরক্তা ট্রাইপার্টাইট এগ্ৰিমেন্ট অমা খূৎয়েক পীনদুনা সূ গী মতম অমূক শাংদোকখ্রে।
হন্দক্কি অসীদি হান্না চৎনরম্বা গ্ৰাউন্দ -রুল অদূ খরমখৈ নীঙথীনা শেমদোক্লবা মতূঙদা এগ্ৰিমেন্ট খূৎয়েক পীনখিবনি। এগ্ৰিমেন্ট অসী চহী অমা চৎনগনি।মিনিষ্ট্রি ওফ হোম এফ্যের্স, মনিপুর লৈঙাক অমসুং কুকি-জো ইন্সর্জেন্ট হায়রিবা অহুম অসীগী মরক্তা য়ান্নচেরোল সাইন তৌনখিবনি।
চৎলিবা আগষ্ট থা অসীগী ৮ দা ন্যূ দিল্লিদা খূৎয়েক পীনখিবা এগ্ৰিমেন্ট অদূগী মতূঙ ইন্না, কন্সটিট্যুসনগী ফ্রেমৱার্ক মখাদা পোলিটিকেল দাইলোগ তৌনবগী ৱাফম য়াওরি। ট্রাপর্টাইট টোল্ক অদুদা কুকি নেস্নেল ওর্গানাইজেসন (কে এন ও) অমসুং য়ুনাইটেদ পীপল্স ফ্রন্ট (য়ূ পি এফ) না কুকি-জো ইন্সর্জেন্টশিংগী মায়কৈদগী রিপ্রজেন্টেটিবশিং ওইনা শরূক য়াখি।
নৌনা খূৎয়েক পীনখিবা অদুগী মতূঙ ইন্না সেন্সিটিব ওইবা এরিয়াশিংদা হৌজিক লৈরিবা ইন্সর্জেন্ট গ্ৰূপশিং অসীগী দেজিগ্নেটেদ কেম্প ৭ হোংদোহন্ননবা ৱাফম য়াওরি অদূগা হৌজিক মনিপুরদা লৈরিবা ইন্সর্জেন্ট গ্ৰূপশিং অসীগী দেজিগনেটেদ কেম্প ১৪ রোম অসীসু মশীং হন্থহনবদা য়ানখ্রে। কুকি-জো ইন্সর্জেন্টশিংনা পায়রিবা খূৎশু-খূৎলায় পূম্নমক মনাক নকপদা কেম্প হাংদুনা লৈরিবা সি আর পি এফ নত্রগা বি এস এফ কি কেম্পশিংদা সরেন্দর তৌদুনা থমগদবনি হায়বা ৱাফমসু য়াওরে।
পনবা য়াবদি, হৌজিক মনিপুরদা লৈরিবা তোঙান তোঙানবা দেজিগনেটেদ কেম্পশিংদা কুকি-জো কাঙলূপকি কাদর ২,২০০ রোম লৈরিবনি।