এম এল এ শ্যাম্না হান্নগী এম এল এ জয় অসী লেম্না লৈহন্নিংই হায়খ্রে

ষ্টেট এসেমব্লি মীখলদা ওইবা য়াই, নত্রগা এম পিগী মীখলদা ওইরবসু, মমাঙদা কয়ারক হন্না মীরেপ ওইদুনা হঞ্জিন -হঞ্জিন মায় পাকখ্রবসু মমৈথঙদা কয়ারক হন্না মীখলশিংদা মীরেপ ওইরুবদা মায় পাক্লক্ট্রবা হায়বসি মীরেপ অদূ মীয়াম্না য়ানীংদ্রে, পামদ্রে হায়বসি মীরেপ মশা-মশানা খঙজীনগদবনি। মতৌ অসুম্না লাংথবাল কেন্দ্রদা মমাঙদা টার্ম ৭ লক মায় পাক্তুনা এম এল এ অমসুং মিনিষ্টর ফাওবা ওইরম্লবা মীওই অমনা লেমজদবা, তৌহন্নিংদবা থবক-থৌওং কয়া চত্থরিবা অসী লৈবাক মচা তাবা ৱাৎপগী মতৌনি হায়না হৌজিক লাংথবাল কেন্দ্রগী এম এল এ ওইনা লৈরিবা করাম শ্যাম্না ফোঙদোকখ্রে।
মমাঙদা টার্ম কয়ারক হন্না কেন্দ্র অসীগী এম এল এ ওইরম্লবা ওক্রম জয়গী মমীংদি ফোঙদোকপা তৌদনা এম এল এ শ্যাম্না মহাক্কি ৱাফম অসী থমখিবনি। ঙরাং এম এল এ শ্যাম্না চজীং মাইরেনখোংদা লৈবা মহাক্কি য়ূমদা পাঙথোকখিবা পাউমীশিংগা উনবগী থৌরম অমদা ৱাফম অসী ফোঙদোকখিবনি।
হৌখিবা কুমশিং ২০২২ গী ষ্টেট এসেমব্লি মীখলদা মহাক্না অরানবা, অশোয়বা কয়ামরূম চত্থখি হায়না মরাল থঙজীন্দুনা ওক্রম জয়না হায় কোর্ট ওফ মনিপুরদা থাঙ্গৎলকখিবা ইলেক্সন পেটিসন অমগী মতাঙদা হায় কোর্ট অসীনা হৌখিবা চহী মরি মখায় চূপ্না হিয়ারিং চত্থরকখ্রবা মতূঙদা কোর্টনা মহাক্কি ফেবরদা জজমেন্ট অমা চৎলিবা জুলাই থা অসীগী ১৪ দা পীবিরক্লে। মসীনা তাকপদি অচূম্বনা মমৈথংদা জয় হায়বনি হায়খি। ও জয়না থাঙ্গৎলকখিবা ইলেক্সন পেটিসন অদূ মরম চাদে হায়না মনিপুর হায় কোর্টনা খঙহল্লকখিবনি হায়না এম এল এ অসীনা ফোঙদোকখি।