ক্লাস নাইন দগী লোল অহুম তমহন্নবগী থৌশিল এস সিনা য়াখিদ্রে

সেকেন্দরি থাক্কি অঙাঙশিংদা লোল অহুম তম্নবগী ৱাফম অসী খুদোংচাবা ওইরোই হায়বা ওবজার্বেসন পীখিবগা লোয়ননা লৈবাক অসিগী খ্বাইদগী অৱাংবা ৱায়েল লোয়শঙ ওইরিবা সুপ্রিম কোর্টনা,  ক্লাস নাইনদগী লোল অহুম তমহন্ননবা সি বি এস ইনা লৌখৎলক্লিবা খোঙথাং অদূ খূদক্তা হন্দোক্নবা খঙহনখ্রে। বোর্দকি থৌরাং অদূ এপেক্স কোর্ট অসীনা য়াখিদ্রে। সেন্ট্রেল বোর্দ ওফ সেকেন্দরি ইদুকেসন (সি বি এস ই) গী মখাদা লৈবা স্কুল খূদীঙমক্তা ক্লাস নাইন দগী হৌরগা লোল অহুম তমহন্নবা লৌখৎলকখিবা থৌশিলগী মায়োক্তা পেটিসন কয়ামরুম তোঙান তোঙানবা মায়কৈদগী সুপ্রিম কোর্ত তা থাঙ্গৎনরকখিবনি।

পেটিসনশিং অদূগী হিয়ারিং চত্থরকপদা এপেক্স কোর্ট অসিগী চিফ জষ্টিস সুরিয়া কান্ত অমসুং জষ্টিস দি ভি নাগরত্নাগী বেঞ্চ অমনা হায়, সেকেন্দরি থাক্কি মহৈরোয়শিংদা লোল অহুম তম্বীবগী থৌশিল অসীগী মায়োক্তা থাঙ্গৎনরক্লিবা পেটিসনশিং অসীগী মতীক চাবা পাউখুম সি বি এস ইনা পীরক্কদবনি। অহুমশুবা লোল তম্বিবগী মতাঙ অসী মহৈরোয়শিংনা ক্লাস নাইন য়ৌরকপদা লোইশিনগদবনি হায়বা ৱাফম পল্লদুনা জষ্টিস নাগরত্না না হায়, অঙাঙ ওইরিঙৈ মতমদদি মহৈরোয়শিংনা লোল অহুম তম্বদা খুদোংচাদবা থোইনা লৈতে। সেকেন্দরি গী থাক য়ৌরকপা মতমদদি খুংদোংচাদবা লৈগনি হায়খি। ক্লাস ফাইভ অমসুং সিক্সতা লৈরিবা মহৈরোয়শিংগী গার্জি‌‌য়ান শিংনা,শেমদোক্লবা অনৌবা থৌশিল অসী মতৌ করম্না চৎনহনগদৌরিবনো হায়বা ৱাহংশিংগা লোয়ননা পেটিসনশিং সুপ্রিম কোর্ত তা ফাইল তৌরকখিবনি। একাদেমিক সেসন ২০২৬-২৭ তগী শুংশোয় শোয়দনা ক্লাস নাইনদগী হৌরগা লোল অহুম তমহন্ননবা থৌরাং অমা সি বি এস ইনা লাউথোকখিবনি।

লোল অহুমগী মনূঙদা অনীদি ইন্দিয়াগী লোল ওইগদবনি অদুগা অহুমশুবা অদূনা মপান লৈবাক্কী লোল অমা হেক্তা ওইবা য়াগনি হায়না মমাঙদা লাউথোকখিবনি। অমরোমদা মহৈরোয়শিংগী মমা মপা ওইবশিংনা ফোঙদোক্নরকখিবা মতূঙ ইন্না, তোঙান তোঙানবা ইন্দিয়াগী লোলশিং নীংথীনা তম্বিবা ঙম্বা, মপূঙ ফানা ত্রেন তৌরবা ওজা মতীক চানা লৈতে হায়বসিনি। মসীগীসু মথক্তা, তঙায়ফদনা চঙগদবা মচাক-মথূম মরাঙ কায়না লৈতবনা সি বি এস ইনা লৌগৎলক্লিবা খোঙথাং অসী ওইথোকপা য়ারোই হায়বা ৱাফমশিং পুখৎনরকখিবনি।