শ্বামি সাপম মীহাৎকি মায়োক্তা ঈমাশিংনা রেল্লি চৎখ্রে

থৌবাল পুলিস ষ্টেসনগী মনূঙচন্না লৈরিবা খেকমন নীংথীবি খোং মনাক্তা, চৎলিবা জুলাই থা অসীগী ৫ গী অয়ূক্তা মীহাৎ থীনা হাৎলবা মতূঙদা হুন্দোক্লম্বা শ্বামি সাপম (২৬)গী মীহাৎ য়াম্না কন্না য়ানিংদবা ফোঙদোক্তুনা লমদম অদোমগী মৈরা পায়বী ঈমাশিংনা ঙরাং মৈরাগী খোঙচৎ অমা পাঙথোকখ্রে। শ্বামি সাপম অসী থৌবাল লৈশাংথেম কেলি মখোঙদগীনি। মীহাৎ অদুদা চেন্নরিবা মীওইশিং ঙসীফাওবা লৈঙাক্না ফাগৎপা ঙমদববু ঈমাশিং অদুনা য়াম্না কন্না পেন্দবা ফোঙদোক্নখি।

ঈমাশিংনা, মীহাৎপশিং অথূবা মতমদা পুথোক্তুনা আইনগী মতীকচাবা চৈরাক পীগদবনি হায়বা দাবী তকশীনখি। জে এ সি এগেন্স ব্রূটেল কিল্লিং ওফ শ্বামি সাপম্না শীন্দুনা চৎখিবা মৈরাগী খোঙচৎ অদূ লৈশাংথেম খোং মনূঙ, থৌদাম, খেকমন অমদি কেলি মখোঙনচিংবা তোঙান তোঙানবা মফমশিংদগী থোক্নরক্তুনা লৈশাংথেম কৈথেলদগী চৎপা হৌখিবনি। কৈবুং, খেকমন থোংজাউ,খেকমন ৱাংমাতাবা অমদি তাকয়েঞ্জম ফাওদুনা চৎলবা মতূঙদা অমূক হন্না লৈশাংথেম কৈথেলদা য়ৌরক্তুনা লমথূঙফম ওইখি। মীহাৎ  অদূগী মতাঙদা শেমখিবা জে এ সীগী কনভিনর সাপম ইনাওচানা ফোঙদোরকপদা, চৎলিবা জুলাই থা অসীগী মাপন ফাওবগী মনূঙদা মীহাৎ অদূদা চেন্নরিবা মীওইশিং পুথোক্তুনা চৈরাক পীবীয়ু হায়দুনা চিফ মিনিষ্টর য়ূম্নাম খেমচান্দ, দি সি থৌবাল অমসুং এস পি থৌবালদা জে এ সিগী মায়কৈদগী অইবা চেরোল পীদুনা তকশীনবসু লৈখ্রে হায়খি।

লৈঙাক্না হীরম অসীগী মতাঙদা ঙসীফাওবা মীওই অমা ফাওবা ফাগৎপা লৈত্রি। থৌওং অসী লৈশাংথেমগী মীয়াম্না য়ানিংদে। অথূবা মতমদা মীহাৎপা মীওইশিং পুথোক্তুনা অকনবা চৈরাক পীদ্রবদি জে এ সিনা মীয়ামগা লোয়ননা হেন্না অকনবা খোঙজং কয়ামরুম চত্থরগনি হায়না ইনাওচানা মখা তাখি।