লৈঙাক-সাসনগী মথোঙ খঙদ্রবা, মপী-মপা পান্দ্রবা বি জে পিগী লাংদা মীয়াম পঙথবিরনু: তিলোতামা

লমদমসিদা লো এন্দ ওর্দর ঙাকপা ঙমদ্রবা, মীয়ামগী চাওখৎ-থৌরাংগী থবক পায়খৎপদি লায়রদনা লৈঙাক্কি ওফিস অয়াম্বা ফঙ্কসন তৌদনা, থোঙ লোন্দুনা লৈরবা বি জে পিগী দব্বল ইঞ্জিনগী লৈঙাক অসীদগী ঐখোয়না মখাতানা করি করম্বা অনৌবা আসা তৌনিঙায়বু লৈরিবগে হায়না মনিপুর প্রদেস কংগ্ৰেস কম্মিটি (এম পি সি সী) গী ভাইস-প্রসিদেন্ট ওইরিবি লোইতোংবম তিলোতামানা ফোঙদোকখ্রে।
ঙরাং ইম্ফালগী কংগ্ৰেস ভাবন্দা পাংথোকপা পাউমীশিংগা উনবগী থৌরমদা মহাক্না ৱাফম অসী ফোঙদোকখিবনি। মহাক্না হায়, বি জে পিগী দব্বল ইঞ্জিনগী লৈঙাক অসিনা মীয়ামগী পুন্সি অমদি লন-থুম কন্ননবা থবক অমত্তা লৌখৎপা ঙমদ্রে। মী মশেল হাৎনহল্লে। মী শিরগা শিজরসনু, এক্স গ্ৰেসিয়া পীগনি, অচৌবা ক্রাইমগী থৌদোক থোক্লগনা এন আই এদা শিন্নথোক্কনি হায়বা ৱাখলদা লৈরে। মসিদা ঐখোয় মীয়াম্না বি জে পিদগী করি আসা অমা অমুক তৌনিঙাই লৈরিবগে হায়না তিলোতামানা থম্লক্লি।
মথৌ পাঙথোকপা হৈত্রবা, দিল্লিগী য়াকা ঙাইরগা লৈজরবা, হংলাইগা পাঙ্খক ওইরবা বি জে পি লৈঙাক অসীগী লাংদা থুদনবা ঐখোয় পূম্নমক চেকশীল্লসি হায়না মহাক্না ফোঙদোকখি। হুরানবা মতূঙ মৈরিংবগী থৌওংশিং বি জে পি লৈঙাক অসিনা খূদক্তা থাদোক্কদবনি। নেস্নেল হায়ৱে প্রোটেক্সন এক্ট থবক্তা ওন্থোক্তুনা চৎনহনবা ঙমদ্রে। নেস্নেল হায়ৱেশিংদা মীচম্না মনীং তম্না চৎপা য়াদনা লৈরকপা চহী অহূম হেল্লক্লে।হোষ্টেজ ক্রাইসিসকি ইস্যু লোইশিনবা ঙমদ্রি।কাঙলূপ অনীমক্কি মীওই ২০ ফাজীন্দুনা, মতম অসূক কুইনা থমজিনখ্রবসু লৈঙাক অসীনা মীচমশিং অদূগী খোঙ্গুল লীদুনা কন্ননবা হোৎনবা উদে।অশীবনা মাঙজবগী থাক্তা লৈরি হায়না মহাক্না বি জে পিগী লৈঙাক অসিবু য়াম্না কন্না কন্দেম তৌখি।
ঈরাঙ অসীনা লমদমসিগী মীরোল অমা মনীঙ হলহল্লগনি হায়বসি বি জে পিগী লৈঙাক অসিনা কাউবা চুম্লোই হায়না তিলোতামানা পাউমীশিংদা ফোঙদোকখি।