তমেংলোং দিষ্ট্রিক্ট হেদক্বার্টরদা লৈরিবা মিনি সেক্রেটরিয়েট হোলদা ঙরাং লমদম অদূগী এম এল এ ওইনা লৈরিবা জামহেংলুং পানমৈনা ইন্টর্নেস্নেল ষ্টেন্দর্দ তা সিন্থেটিক ফুটবোল টর্ফ অমা শাননবা উরেপ-উয়ুং তম্বগী থৌরম অমা পাঙথোকখ্রে।
লমদম অসোমদা মালেমগী থাক্তা সিন্থেটিক ফুটবোল টর্ফ অমা শাগদৌরিবা অসী শীঙথানিঙায় ওইরবা খোঙথাং অমনি হায়বা ৱাফম ফোঙদোক্লদুনা, ফুটবোল টর্ফ অসী মপূঙফানা, অপীবা মতমগী মনুংদা লোইশিন্নবা থবকশিং পায়খৎলকপদা মায়কৈ অদূগী মীয়াম্না মতেং পাংবিয়ু হায়না এম এল এ জামহেংলুংনা ফোঙদোকখি।
লাক্কদৌরিবা থা অনীগী মনূঙদা ১৩৩ কে ভি নরাইলোং পৱার সব-ষ্টেসন ফঙ্কসন তৌননবা হোৎনরি হায়না এম এল এ অসীনা মীয়ামদা খঙহনখি। চৎলিবা চহি অসিদা রিজিদ পেভমেন্টগা লোয়ননা টাউন রিংরোদ শেমগৎলিবা অদুসু মপূঙ ফানা লোইশিনবা ঙম্লগনি হায়খি অদুগা তমেংলোং দিষ্ট্রিক্ট কি ওইনা রিজিদ পেভমেন্ট গী থবক-থৌরমশিং চাদা ৯০ লোইশিনবা ঙম্লে হায়বা ৱাফম মহাক্না থমখি।
দিষ্ট্রিক্ট এদমিনিষ্ট্রেসনগী মায়কৈদগী, থৌরমদুদা ৱা ঙাঙখিবা ঙমথাঙো কামৈ,এম সি এসনা হায়, ফুটবোল টর্ফ শাননবা প্রোজেক্ট অদূ, দি আর দি এ তমেংলোংগী মখাদা পায়খৎকদবনি।লূপা ক্রোর ৬ চঙনা শাগদৌরিবা সিন্থেটিক ফুটবোল টর্ফ অদূ মালেমগী ষ্টেন্দর্দ তা শেমগৎকদবনি অদুগা এন ঐচ পি সী লিমিটেদকি মীৎয়েং মখাদা শাগদবনি হায়খি।
