ৱাহং তরূক য়াওবা মেমোরেন্দম কোকোমিনা ঙসী সি এমদা পীশীনগদৌরি

মনিপুরদা, মপান লৈবাকশিংদগী লোন্না, আইনগী ৱাংমদা চঙশীল্লকখিবা ফোরেন ইম্মিগ্ৰেন্টশিংনা, মরূ ওইনা চিন-কুকি নার্কো টেরোরিষ্টশিংনা মনিপুরবু মচেৎ তানা থুগাইরগা মখোয়গী লমদম অমা শেমগৎনবা হোৎনরক্তুনা লমদমসিগী য়েলহৌমীশিংদা লান্দারক্তুনা নূপী অঙাঙ খাক্তনা হাৎপগী থবক, চহী অহুম চূপ্না চত্থরক্লফাওবা সেন্তর অমসুং ষ্টেট লৈঙাক্না মিলিটেন্ট অমফাওবা ফাগৎপা ঙমদবা অমসুং মখোয়বু লাকশীন্ননবা ওইথোকপা য়াবা থৌরাং অমত্তা লৌখত্তনা লৈথোক্লিবা অসীগা মরী লৈননা লমদমসিগী মীয়াম্না নোংমা কাংদনা লম্বী লমজাউশিংদা থোক্নরক্তুনা পেন্দবগী অমদি খোয়রাঙ-খোয়শাওনবগী অকনবা খোল্লাউ কয়া লাউদুনা লাক্লি।
মসীগী মখা তারকপা খোঙথাঙ অমদা ঙসী নুংথিল পূঙ অমা তাবদগী, কোর্দিনেটিং কম্মিটি ওন মনিপুর ইন্টিগ্ৰিটি (কোকোমি) গী লমজীঙ মখাদা মশীঙ য়াম্লবা মীয়াম্না অচৌবা ৱাকৎ খোঙচৎ অমা চৎকদৌরি।মায়কৈ কয়াদগী লাক্কদবা মৈরা পায়বী লূপশিং,ক্লবশিংগী থৌমীশিং, সি এস ওশিংগী মেম্বরশিং অমদি মীয়াম্না শরূক য়ারদুনা চৎকদৌরিবা অচৌবা ৱাকৎ খোঙচৎ অসীদা কোকোমিনা চিফ মিনিষ্টরগী মফমদা ৱাহং তরূক য়াওরবা মেমোরেন্দম অমা পীশীন্ননবা থৌরাং তৌরি।
য়েলহৌমী মূত্থৎনবা চত্থরক্লিবা প্রোক্সী ৱার অসী লেপহন্ননবা করম্বা থৌরাং লৈঙাক অসীনা লৌখৎলিবগে, করম্বা মতম ফাওবদা প্রোক্সী ৱার অসী মপূঙ ফানা লেপহনবা ঙমগদগে, অঙাঙ য়াওনা মরাল লৈজদ্রবা মীওই কয়ামরুম হাৎখ্রিবা অসীগী জষ্টিস করম্বা মতমদা ফংহনগদগে,আই দি পিশিং মশাগী ময়ূমদা মপূঙ ফানা হঞ্জিলহনবা য়াননবা করি-করম্বা রোদমেপ শেম্লবগে হায়বনচিংবা ৱাহংশিং মেমোরেন্দম অদূদা য়াওই হায়রি।