টোটেল সটদাওনগী খোঙজঙ অসী মীয়ামগী য়েংলগা খূদক্তা হন্দোকপিয়ু : চিফ মিনিষ্টর

ট্রোংলাউবীগী জে এ সিনা হৌজিক মনিপুর পূম্বদা চত্থরিবা নুমিৎ মঙানিগী টোটেল সটদাওন অসী লমদম অসীগী খম থেংনা অৱাবা, খুদোংচাদবা কয়ামরুম মায়োক্নরগা লৈরিবা মীয়াম অসীগী য়েংলগা খূদক্তা হন্দোকপিয়ু হায়না মনিপুরগী চীফ মিনিস্তর য়ূম্নাম খেমচান্দনা মরী লৈনবশিংদা আপিল তৌরক্লি। ট্রোংলাউবিগী থৌদোক অসী মনিপুর মীয়ামগী পূক্নীঙ অমদি থম্মোয় খূদীংমক্তা তাশোন্না থিনখিবা, খ্বাইদগী হেন্না থম্মোয় শোকহনখিবা থৌদোক অমনি।

থৌদোক অসীগা মরী লৈননা শেমখিবা জে এ সিগী মীহূৎশিংগা অনীরক ফম্মিন্নদুনা, মখোয়গী অনীঙবা – অপাম্বা খূদীঙমক থবক্তা ওন্থোকপদা য়ান্নখ্রবনি।মখোয়না দিমান্দ তৌদবা থবক ফাওবা পায়খৎকনি হায়বা ৱাফমশিং খঙহনখ্রবনি। লৈখিদ্রবা অঙাঙ অনীগী অপোকপা, হৌজিক বি এস এফতা লৈরিবদু মনিপুরদা পোষ্টিং  অদুম্মক লৈহন্দুনা, ঈমূঙ-মনূঙগী মীওইশিংগা লৈমিন্নবা য়াননবা আই আর বিদা এ এস আই ওইনা পুথোরক্লগে, অদূগা অঙাঙশিং অদূগী অপোকপীসু লৈঙাক্কি মখাদা নর্স ওইনা থবক পীরগনি হায়বা ৱাফম খঙহনখিবনি।মসী জে এ সীনা দিমান্দ তৌরকখিবশিং অদূগী মথক্তনি হায়না চিফ মিনিষ্টরনা ফোঙদোকখি।

জেএসিগী মীওইশিং হরাও হরাওনা সি এম সেক্রেটরিয়েত্তগী হনখ্রবা মতূঙদা নুমিৎ মঙানিগী টোটেল সটদাওনগী খোঙজঙ লাউথোরক্লে। মসীদি করি হায়গদবনো ভাব অমা তারক্ট্রে হায়না চিফ মিনিষ্টরনা মখা তাখি। কুমশিং ১৯৪৩ গী এপ্রিল ২০ দা জপান্না বোম থাধরকপদা মীওই ক‌য়া শিহনখিবা থৌদোক নীংশীংবগী থৌরম অমা, বোম তারকখিবা মফম খূরায় চীঙাংবম লৈকায়গী মান্দোপতা পাঙথোকখিবদা অথোয়বা মীথূঙলেন ওইনা মহাক্কি ৱারোল পীবদা চিফ মিনিষ্টরনা ৱাফম অসী ফোঙদোকখিবনি। বোম তাখিবা খূরায়গী মফম অসী হেরিটেজ সাইট অমা ওইনা শেমগৎনবা হোৎনগনি হায়নসু চিফ মিনিষ্টরনা মীয়ামদা থাজবা পীখি।