মীয়াম্না দিমান্দগা মরী লৈননা খোঙজঙ চঙশীনবদা পব্লিক প্রোপর্টি মাঙহন্দনবা ইম্ফাল ৱেষ্টকি এস পিনা আপিল তৌরক্লি

মনিপুরদা হন্দক থোকখিবা লাইবক থীবা, মীয়াম্না পামদবা হীঙশাগী থৌদোকশিং অমদি অতৈ তোঙান তোঙানবা মখলগী দিমান্দশিংগা মরী লৈননা মীয়াম্না পব্লিক রেল্লি, মৈরাগী খোঙচৎ, দিমোন্সট্রেসন্নচিংবা লম্বীদা চত্তুনা লৈঙাক্কি নাকোং য়ৌহন্ননবা থৌওং কয়ামরুম চত্থরিবা অসিদা, পামদবা থৌদোকশিং য়ারিবমখৈ থোকহন্দনবা মনিপুর পুলিস অমদি অতৈ সেক্যুরিতি ফোর্সশিংনা নীংথীনা পাউ ফাওদোক্নদুনা মীয়ামগী খোঙচৎশিং অদূবু ঙাক-শেন্দুনা কো-ওপরেসন পীদুনা লাক্লি।
মীয়াম্না দেমোক্রেটিক ওইবা খোঙজংশিং চঙশীল্লকপদা অহীঙ-নুংথিল খায়দনা মতেং পাংদুনা লাক্লি। মীয়ামগী পেন্দবা খোল্লাউশিংগা লোয়ননা খোঙচৎ অদুগী লমথাফমশিংদগী পন্থুংফম য়ৌবা ফাওবা মনিপুর পুলিস পার্সনেলশিংনা খোঙজঙলোয়শিংগী মাঙ অমসুং তুংদা ঙাক-শেন্নদুনা অশোয়-অঙাম থোকহন্দনবা অমদি খোঙচৎশিং অদূ মপূঙ ফানা পাঙথোকপা ঙমহন্ননবা মতেং পাংলি। অদূম ওইনমক লমহেন-তুহেনবা মীওই খরনা য়াম্না তোয়না পব্লিক প্রোপর্টিশিং টার্গেট তৌদুনা য়ৈখায়-থিনগাইবা, অমাঙ-অতাশিং থোকহনবা য়াওরকপা অসীদি য়াম্না লাইবক থীবনি। অসীগুম্বা থৌওংশিং মতূঙদা থোকহন্দনবা হোৎনবিয়ু হায়না ইম্ফাল ৱেষ্ট দিষ্ট্রিক্টকি এস পি কে ঐচ সিবকান্তনা মরী লৈনবা মীয়ামদা আপিল তৌরক্লি।
মহাক্কি ওফিস চেম্বরদা ঙরাং পাউমীশিংগা উনবদা ৱাফম অসী মহাক্না ফোঙদোক্লদুনা মখা তানা হায়, রেল্লি চৎপদা য়াওরিবা লমহেন-তুহেনবা নহাশিংনা পুলিসকি গারি নত্রগা অতৈ সেক্যুরিতিগী মীওইশিংদা নাউরি কাপশীনবা, সিক্সটিন এম এমগী য়োৎ মকক্না নাউরি মরূ শেম্লগা নাউরিনা কাপ্লকপদা পাউমীশিংদা অমদি পুলিসকি মীওইশিং অশোক-অপন থোকপা কয়াসু য়াওরি। থৌওং অসী চত্থবিগনু।ঐখোয় মশেল কোওপরেসন পীনরগা থবক চঙশীনমিন্নরবদি খোঙজঙ পূম্নমক মায় পাক্তবা লৈরোই হায়না এস পিনা ফোঙদোকখিবগা লোয়ননা ঐখোয় পূন্না ঈরমদম অসীদা শান্তি পুরক্নবা হোৎনমিন্নসি হায়না মীয়ামদা আপিল তৌরক্লি।
মসীগা লোয়ননা রেল্লি চৎলিবা মীওইশিংদা কনাগুম্বা মীওইশিংনা লম্বী নাকন্দগী নাউরি, পেট্রোল বোম, অমদি অতৈ খূৎশু-খূৎলায়শিং পীশীন্দুনা পব্লিক প্রোপর্টি শিং থুগাইনবা অমদি পূলিসতা অতম্ননা এত্তেক চত্থনবা ঈন্সীনবগী থৌওংশিং চত্থবা য়াওরক্লিবসি পুলিসনা ময়েক শেংনা খঙই, মতূঙদা অসীগুম্বা থৌওং শিং চত্থবিগনু হায়বা ৱাফমশিংসু ফোঙদোকখি।
কা হেনবা থৌওং চত্থরক্লবদি পুলিসনসু আইনগী ওইবা মথৌ তাবা এক্সন লৌখৎলকপা নত্তনা অতৈ পাম্বৈ লৈরক্লোই হায়খি।