মিলিটেন্টশিংনা এম্বুস তৌরকপদা তাঙ্খুল কাঙলূপকি মীওই অনী শিরে

চৎলিবা এপ্রিল থা অসীগী ১৭, ইরাই নুমিত্তা মনিপুরগী চিফ মিনিষ্টর য়ূম্নাম খেমচান্দনা, হৌজিক তোঙান তোঙানবা কাঙলূপশিংগী মরক্তা য়াম্না কন্না য়েংথীনরিবা, হাৎন-শুনরিবা অমদি কাঙলূপশিংগী মরক্তা লৈনরিবা থাজনদবগী ফীভমশিং অসী কোকহন্দুনা ঈংনা, শান্তি ওইনা মহৌশাগুম নুংশি-চাননা লৈমিন্নবা য়াননবা মহাক্কি ট্রষ্ট বিল্ডিং মিসন অমা ঊখ্রূলদা চত্তুনা তাঙ্খুল অমদি কুকিশিংগী লুচিংবা অমসুং লূপশিংগী লুচিংবা কয়াগা মীফমশিং পাঙথোক্তুনা শান্তিগী ৱারী শান্নখিবা নুমিৎকি মথঙ নোংঙানবা, এপ্রিল ১৮ মক্তদা, নুংথিল পূং অনীমখায় খরা হেল্লকপদা কুকি মিল্লিটেন্টশিংনি হায়না চিংনবা,অফবা মখলগী খূৎলাইশিং পায়বা শকখঙদবা মিলিটেন্টশিংনা এম্বুস তৌরকপদা তাঙ্খুল ফূরুপকি মীওই অনী শিরে অদূগা মীওই কয়ামরূম শোক্লে।
চিফ মিনিষ্টরনা এপ্রিল ১৭ তা ঊখ্রূলদা লাক্লম্বা মতমদুদা, এপ্রিল ১৮ দগী ইম্ফাল -ঊখ্রূল লম্বী ওইরিবা নেস্নেল হায়ৱে ২০২ দা তাঙ্খুল অমদি কুকি কম্যুনিটি অনীগী মীচম-মীয়াম্না চিংনবা লৈতনা চত্থোক-চৎশিন তৌবা য়ারগনি, লম্বী পরীং অসীদা মতীক চানা সেক্যুরিটি ফোর্সনা ঙাক -শেল্লগনি হায়না ফোঙদোক্লম্বা মতূঙ ইন্না এপ্রিল ১৮ দা গারি খরদা তাঙ্খুলগী মীচমশিং অদূ ইম্ফালদগী উখ্রূল তম্না লাকপদা লিটান এরিয়াদগী খরা হেন্দোক্লবা মতূঙদা এম্বুস তৌরকখিবনি হায়রি।
এম্বুস অদুদা ঊখ্রূল দিষ্ট্রিক্ট মনূঙচন্না লৈরিবা তসর ভিল্লেজদগী এস দব্লিয়ু চিনাউশঙ (৪৩) অপোকপা এস দব্লিয়ু রুইচূমহাও কৌবা অমা, খারাসোম ভিল্লেজদগী য়ারুইঙম ভাসুম (৪২) অপোকপা থুইমি ভাসুম কৌবা তাঙ্খুল অমসু লৈখিদ্রে।
ওইরক্লিবা ফীভম অসী য়াম্না অরুবা তাঙ্কক অমদা লাক্লি। চিফ মিনিষ্টরনা থৌদোক অসীবু অকনবা মওংদা কন্দেম তৌবগা লোয়ননা মরাল লৈবশিং অথূবা মতমদা ফাগত্তুনা খ্বাইদগী অকনবা আইনগী চৈরাক পীননবা হোৎনগনি হায়বা ৱাফমসু ফোঙদোকখ্রে।