মীয়ামগী খোঙজঙশিং অকনবা মওংদা চত্থরি

মীয়ামগী পুন্সি অমসুং লন-থুম ঙাকপা ঙমদ্রবা সেন্ট্রেল সেক্যুরিটি ফোর্সেস মনিপুরদগী হনখ্রো, সেল্ফ দিটরমিনেসন ইজ অৱার বার্থ রাইট হায়না থাবা প্লেকার্দ কয়াগা লোয়ননা মনিপুরগী তোঙান তোঙানবা মফমশিংদা ক্লবশিং অমদি মৈরা পায়বীশিংনা পাক-সন্না অকনবা মওংদা খোঙজঙশিং চঙশীনবা লেপত্রি। মসীগী শরুক অমা ওইনা ঙরাংসু ইম্ফাল ইষ্ট দিষ্ট্রিক্টকি খূরায় কেন্দ্রগী মনূঙচন্না লৈরিবা মোইরাংকম্পু য়ুনিয়ন ক্লব, টিন্সিদ রোদকি নাকন য়েৎ-ওইদা লৈরিবা ক্লবশিং অমদি মৈরা পায়বী লূপশিং খূৎশম্নদুনা খেৱা কৈথেলদা অচৌবা সিট-ইন-প্রোটেষ্ট অমা পাঙথোক্তুনা খোল্লাউ কয়া লাউখি।

থৌরমদুদা ৱা ঙাঙবদা মোইরাংকম্পু য়ুনিয়ন ক্লবকি ভাইস প্রসিদেন্ট মোইরাংথেম সুরকুমারনা হায়, চৎলিবা এপ্রিল থা অসীগী তরেৎকি অহীঙ নোংয়াই মতূঙ পূঙ অমা মখায়রোম তারকপা মতমদা বিষ্ণুপুর দিষ্ট্রিক্টকি মনূঙচন্না লৈরিবা ট্রোংলাউবী অৱাং লৈকায়দা কুকি মিলিটেন্টশিংনা বোম কাপশীন্দূনা নৌরিবা অঙাং অনী হাৎখিবা অমসুং মখোয়গী অপোকপী মমাবু তমথীনা শোকহনখিবা থৌদোক, লোয়ননা মীয়ামগী ঈহৌদা সি আর পি এফনা কাপ্পদা লৈখিদবা মীওই অহুমগী মফমদা ইকায়খুম্নবা উত্তুনা খোঙজঙ অদূ চঙশীনখিবনি।

শাহীঙ চাবা, হিংচা-য়াইতম্বা কুকি মিলিটেন্টশিংগী মথক্তা মিলিটরি ক্রেকদাওন চত্থগনি হায়না চিফ মিনিষ্টর য়ূম্নাম খেমচান্দনা মীয়ামদা লাউথোকখিবা অদূ খূদক্তা থবক ওইনা ঊৎকদবনি। থৌদোক অদূগী মতাঙদা লৈখিদ্রবা ভিক্তিম মঙা অদুগী জষ্টিস ফংহনবা ঙমদ্রিবা অসী খ্বাইদগী লাইবক থীবনি হায়না মহাক্না মখা তাখি। ইম্ফাল ইষ্ট দিষ্ট্রিক্টকি কৈরাউ বিত্রদসু মীয়াম্না মীহাৎপা কুকি মিলিটেন্টশিং ফাগত্তুনা খ্বাইদগী অহকপা চৈরাক মীয়াম খঙনা পীয়ূ হায়বা খোল্লাউ কয়া লাউদুনা খোঙজঙ চঙশীনখি।